بڕیارە سبەی یەکشەممە کە دەکاتە ٨ی شوبات، هاوپەیمانیی بەڕێوەبردنی دەوڵەت کۆبوونەوەیەکی گرنگ و چارەنووسساز ئەنجام بدات و تێیدا بافڵ جەلال تاڵەبانی سەرۆکی یەکێتیی نیشتمانیی کوردستان بۆ بەشداریکردن لەو کۆبوونەوەیە و گفتوگۆکردن لەسەر پرسە هەڵپەسێردراوەکان سەردانی بەغدادی پایتەخت بکات.
ئامانجی سەرەکی ئەم کۆبوونەوە فراوانەی هاوپەیمانیی بەڕێوەبردنی دەوڵەت کە بە ئامادەبوونی نێچیرڤان بارزانی بەڕێوەدەچێت بریتییە لە یەکلاکردنەوەی کۆتایی هەردوو پۆستی سەرۆککۆمار و سەرۆکوەزیرانی عێراق و هاوکات تاوتوێکردنی دوایین پێشهاتە سیاسییەکانی ناوخۆی وڵات و هەرێمی کوردستان و گۆڕانکارییەکانی ناوچەکە.
لە لایەکی ترەوە عەباس مووسەوی ڕاوێژکاری میدیایی نوری مالیکی جەختی لەوە کردووەتەوە کە کۆبوونەوەکە بۆ گەیشتن بە ڕێککەوتنی کۆتاییە لەسەر کاندیدی پۆستە سیادییەکان و دووپاتی کردووەتەوە کە چوارچێوەی هەماهەنگی هەڵوێستێکی ڕوونی هەیە و گفتوگۆکانیان لەسەر بنەمای پێشهاتە نوێیەکان دەبێت.
سەبارەت بە دەنگۆکانی کشانەوەی کاندیدەکان مووسەوی ئاشکرای کردووە کە نوری مالیکی هیچ نیازی کشانەوەی نییە و لایەنەکانی ناو چوارچێوەی هەماهەنگی پێداگرن لەسەر کاندیدەکەی خۆیان و هەموو ئەو زانیاری و سیناریۆیانەی لە دەرەوەی ئەم ڕاستییە باس دەکرێن دوورن لە واقیعەوە.
-