خەلیل عوسمان عەبدۆ، ئەندامی شاندی ئاسایشی کۆبانێ کە دوێنێ لەگەڵ بەڕێوەبرانی هێزەکانی ئاسایشی ناوخۆی حکومەتی کاتیی لە حەلەب کۆبونەوە، لە بارەی ناوەڕۆکی کۆبونەوەکە بۆ ئاژانسی هاوار قسەی کردوە و دەڵێت "گەمارۆی سەر کۆبانێ خاڵێکی گرنگی کۆبوونەوەکە بوو، باس لە هەڵگرتنی گەمارۆی سەر کۆبانێ و کردنەوەی سەرجەم ڕێگاکان و گەڕانەوەی ئاوارەکان بۆ سەر ماڵ و حاڵی خۆیان کرا".
دوو شەممە، ٩ شوبات ٢٠٢٦، خەلیل عوسمان عەبدۆ، ئەندامی ئیدارەی ئاسایشی کۆبانێ ڕایگەیاند "کۆبوونەوەکە لە چوارچێوەی جێبەجێکردنی ئەو ڕێککەوتنانەی کە کراوە ئەنجام دراوە، سەرەتا کار و خەبات لە گوندی شێخلەری سەر بە شاری قنێ ئەنجام دراوە، دواتریش ناوچەی چەلەبی و سرین کار ئەنجام دەدرێن، گفتوگۆ لەسەر ئەو خاڵانە کرا و ڕێککەوتنەکان کرا، نزیکەی ١٠ خاڵی هاوبەش لە نێوان هێزەکانی ئاسایش و هێزەکانی ئاسایشی ناوخۆی حکومەتدا دادەنرێن".
لە بارەی ڕێککەوتنەکەیانەوە ئەندامی شاندەکە وتویەتی "بۆ ئەوەی ئاشتی و سەقامگیری لە ناوچەکە بەرقەرارببێت و بۆ ئەوەی کورد و عەرەب بە ئاشتی پێکەوە بژین گفتوگۆکان ئەنجام دراون".
خەلیل عوسمان سەبارەت بە بەردەوامی کۆبونەوەکانیان ئاماژەی بەوە کردوە " کۆبوونەوەکان لە داهاتوودا بەردەوام دەبن و کاری باش دەکرێت".
ماوەی ٢١ ڕۆژە گەمارۆی سەر شاری کۆبانێ لەلایەن گروپە چەکدارەکانی سەر بە حکومەتی کاتی سوریاوە بەردەوامە و هاوڵاتیانی کۆبانێ بێ بەشکراون لە ئاو وکارەبا و هێڵەکانی ئینتەرنێت و چوونی پێداویستیەکانیان بۆ ناو شارەکە.