دەزگای ئاسایشی هەرێمی کوردستان لە چوارچێوەی هەوڵە بەردەوامەکانی بۆ پاراستنی سەقامگیری بازاڕ و ئاسایشی دارایی، سەرکەوتنی ئۆپەراسیۆنێکی وردی ڕاگەیاند.
هێزەکانی بەڕێوەبەرایەتی ئاسایشی پارێزگای سلێمانی دوای کۆکردنەوەی زانیاریی ورد و چاودێریکردنی چڕ، توانییان شوێنپێی باندێکی مەترسیدار هەڵبگرن کە سەرقاڵی ساغکردنەوەی دراوی ساختە بوون و پلانیان هەبوو زیانێکی گەورە بە ئابووری شارەکە بگەیەنن.
ئەمڕۆ دووشەممە، ڕێکەوتی ١٦ی شوباتی ٢٠٢٦، یەکێک لە ئەندامانی سەرەکیی باندەکە بە مەبەستی ساغکردنەوەی بڕی ٤٠ هەزار دۆلاری ئەمریکی ساختە گەیشتە ناو شاری سلێمانی.
لە کاتی هەوڵی هێزەکانی ئاسایش بۆ دەستگیرکردنی، تۆمەتبارەکە ڕەفتاری توندوتیژی نواند و ئامادە نەبوو خۆی ڕادەست بکات، ئەمەش بووە هۆی دروستبوونی ڕووبەڕووبوونەوە کە لە ئەنجامدا تۆمەتبارەکە بە برینداری دەستگیرکرا و دەستبەجێ بۆ وەرگرتنی چارەسەر ڕەوانەی نەخۆشخانە کرا.
لە ئێستادا لایەنە پەیوەندیدارەکان بە فەرمی پەڕاوی لێکۆڵینەوەیان بۆ ئەم کەیسە کردووەتەوە و تۆمەتبارەکە بەپێی ماددەی ٢٨١ لە یاسای سزادانی عێراقی ڕاگیراوە. ئەم ماددە یاساییە تایبەتە بەو کەسانەی کە مامەڵە بە دراوی ساختەوە دەکەن یان دەیانهێننە ناو وڵات.
ئاسایش دووپاتی دەکاتەوە کە لێکۆڵینەوەکان بەردەوامن بۆ ئاشکراکردنی هەموو سەرەداوەکانی پشت ئەم باندە و دەستگیرکردنی هەر کەسێکی دیکە کە پەیوەندی بەم کارە نایاساییەوە هەبێت.