بەرێوەبەرایەتی کەشناسی پێشبینی دەکات بۆ ئەمڕۆ سێشەممە، ئاسمانی هەرێمی کوردستان لە ساماڵ و پەڵەهەورەوە لە کاتەکانی ئێوارەدا بگۆڕێت بۆ هەوری تەواو. لەگەڵ هاتنی شەودا، شەپۆلێکی نمەباران و بارانی مامناوەند سەرەتا لە ناوچەکانی ئیدارەی زاخۆوە دەستپێدەکات و پاشان کاریگەرییەکەی درێژ دەبێتەوە بۆ تەواوی پارێزگای دهۆک و ناوچە شاخاوییەکانی، ئەم گۆڕانکارییە لە کاتێکدایە کە مەودای بینین لە نێوان ٨ بۆ ١٠ کیلۆمەتردا دەبێت و خێرایی با لەسەرخۆ دەبێت.
سەبارەت بە پلەکانی گەرما، پێشبینی دەکرێت بۆ ئەمڕۆ ئاستی گەرما بە بڕی ٢ بۆ ٣ پلە بەراورد بە دوێنێ بەرزبێتەوە.
لە کاتەکانی بەیانی زووی ڕۆژی چوارشەممەدا، کاریگەریی شەپۆلە بارانبارینەکە فراوانتر دەبێت و دەگاتە ئیدارەی ڕاپەڕین و ناوچە شاخاوییەکانی هەولێر و سەنتەری شار، هەروەها پارێزگای سلێمانیش دەگرێتەوە.
هاوکات ئەگەری کەمێک نمەباران لە ناوچەکانی باشووری هەرێم و گەرمیان لە ئارادایە، بەڵام لە دوای نیوەڕۆی ڕۆژی چوارشەممەدا کاریگەریی ئەم شەپۆلە کەمدەبێتەوە و ئاسمان بەرەو پەڵەهەور و نیمچە هەور دەگۆڕێت و کەشوهەوا تا ڕادەیەک جێگیر دەبێتەوە.
بۆ سبەی چوارشەممە، پلەکانی گەرما بە جێگیری دەمێننەوە و هاوشێوەی تۆمارکراوەکانی ئەمڕۆ دەبن.
بەرزترین پلەکانی گەرمای پێشبینیکراو بە پلەی سیلیزی:
هەولێر: ٢٤ پلەی سیلیزی
پیرمام: ٢٠ پلەی سیلیزی
سۆران: ١٩ پلەی سیلیزی
حاجی ئۆمەران: ١٦ پلەی سیلیزی
سلێمانی: ٢٢ پلەی سیلیزی
چەمچەماڵ: ٢٤ پلەی سیلیزی
دهۆک: ٢٠ پلەی سیلیزی
زاخۆ: ٢٠ پلەی سیلیزی
هەڵەبجە : ٢٢ پلەی سیلیزی
گەرمیان : ٢٨ پلەی سیلیزی