ئێوارەی ئەمڕۆ شەممە ٢١ی شوباتی ٢٠٢٦، لە گەڕەکی شۆراوی شاری کەرکوک و لە نزیک کۆلێژی کشتوکاڵ، شەڕ و دەمەقاڵێ لە نێوان دوو کەسدا دروستبوو.
شەڕەکە پەرەی سەندووە و یەکێکیان بە چەک تەقەی لە ئەوی دیکەیان کردووە، لە ئەنجامدا کەسەکە دەستبەجێ گیانی لەدەستداوە.
قوربانییەکە تەمەنی ٤٤ ساڵ بووە، دوای رووداوەکەش هێزەکانی پۆلیسی بنکەی رەحیماوا گەیشتوونەتە شوێنی مەبەست و توانیویانە لە ماوەیەکی کورتدا تۆمەتبارەکە دەستگیر بکەن.
بکوژەکە کەسێکی تەمەن ٣٥ ساڵە بە ناوی (هـ. ئـ) و لە ئێستادا لەژێر لێکۆڵینەوەدایە.
بەپێی زانیارییە سەرەتاییەکان و دانپێدانانی بکوژەکە، هۆکاری سەرەکی تاوانەکە بۆ بوونی کێشەیەکی کۆمەڵایەتی و ئاڵۆزیی نێوان هەردوو لا دەگەڕێتەوە. بکوژەکە ئاماژەی بەوە کردووە کە کوژراوەکە بەردەوام شەڕی پێ فرۆشتوون و ئەوەش وایکردووە پەنا بۆ چەک ببات.
سەرچاوەکانی پۆلیس جەخت لەوە دەکەنەوە، بکوژ و کوژراو "ئاوەڵزاوا"ی یەکتر بوون و ململانێکەیان پەیوەندی بە پرسی ژن و ژنخوازییەوە هەبووە.
لە ئێستادا تۆمەتبارەکە دانی بە تاوانەکەیدا ناوە و پەڕاوی لێکۆڵینەوەی بۆ کراوەتەوە تا رێکارە یاساییەکانی بەرامبەر بگیرێتە بەر.