ئەمڕۆ لە سلێمانی سەرۆکی یەکێتی نیشتمانی کوردستان، بافڵ تاڵەبانی لەگەڵ فەرماندەی گشتی هەسەدە، مەزڵوم عەبدی کۆبۆوە.
سێ شەممە، ٢٤ شوبات ٢٠٢٦، مەزڵوم عەبدی، فەرماندەی گشتی هەسەدە بە سەردانێک گەیشتە سلێمانی و لەگەڵ بافڵ تاڵەبانی سەرۆکی یەکێتی نیشتمانی کوردستان و قوباد تاڵەبانی ئەندامی مەکتەبی سیاسی یەکێتی سەبارەت بە دۆخی سوریا و رۆژئاوای کوردستان کۆبونەوە و گفتوگۆیان کرد.
بە پێی زانیاریەکانی ڕاگەیاندنی یەکێتی "جەنەڕاڵ مەزڵوم عەبدی باسی بەشداریکردنی لە کۆنفرانسی ئاسایشی میونشن کرد و دوایین گۆڕانکارییەکانی دۆخی سووریای خستەڕوو و سوپاسی یەکێتیی نیشتمانیی کوردستانی کرد بۆ هەڵوێست و پشتیوانییەکانی لە بەرەنگاربوونەوەی تیرۆردا".
بافڵ تاڵەبانی لە کۆبونەوەکەدا وتویەتی "لە پشتیوانیکردنی رۆژئاوای کوردستان بەردەوام دەبین تاوەکو دڵنیاببینەوە سوریا دەبێتە وڵاتێک کە هەمووان ماف و نوێنەرایەتیی خۆیان تێیدا دەبێت و حکومەتەکەشی دەرخەری هەمەچەشنیی کۆمەڵگەی سوریا بێت".