وەزارەتی دارایی هەرێمی کوردستان لە راگەیەنراوێکدا دەڵێت "چاوەڕێ دەکرێت لەگەڵ دەستپێکردنەوەی دەوامی فەرمی لە رۆژی یەکشەممەی داهاتوو تەواوی تەمویلی مووچە بخرێتە سەر هەژماری بانکیمان".
ئەمڕۆ پێنجشەممە، وەزارەتی دارایی و ئابووریی هەرێمی کوردستان لە راگەیەنراوێکدا رایگەیاند "نیوەڕۆی رۆژی پێنجشەممە رێکەوتی (٥ی ئازاری ٢٠٢٦) بڕی (٢٧٤) ملیار و (٩٦٢) ملیۆن دینار بە چوار گوژمە وەک بەشێک لە تەمویلی مووچەی مانگی شوباتی مووچەخۆرانی هەرێمی کوردستان کە بریتییە لە تەمویلی مووچەی مانگی شوباتی خانەنشینان و سودمەندانی چاودێریی کۆمەڵایەتی و فەرمانبەرانی گرێبەست و مینحەی زیندانیانی سیاسی، خرایە سەر هەژماری بانکی وەزارەتی دارایی و ئابوریی هەرێمی کوردستان لە لقی هەولێری بانکی ناوەندیی عێراق".
لە درێژەی راگەیەنراوەکەدا وەزارەتی دارایی دەڵێت، رۆژی یەکشەممە لەگەڵ گەیشتنی تەواوی پارەکە و وەرگرتنی لە لقی هەولێری بانکی ناوەندیی عێراق، "راستەوخۆ خشتەی مووچەی مانگی شوبات رادەگەیێندرێت و دەست بە دابەشکردنی مووچە دەکرێت".