ئێوارەی ئەمڕۆ شەممە ١٤ی ئاداری ٢٠٢٦، مەسرور بارزانی، سەرۆکی حکومەتی هەرێمی کوردستان، پەیوەندییەکی تەلەفۆنی لە باڵیۆز "تۆم بەڕاک" پێگەیشت، کە نێردەی تایبەتی سەرۆک دۆناڵد ترەمپە بۆ کاروباری سووریا و هاوکات باڵیۆزی ئەمریکایە لە تورکیا.
لە میانی ئەو پەیوەندییەدا، هەردوولا بە وردی دۆخی گشتیی هەرێمی کوردستان و عێراق و گۆڕانکارییەکانی ناوچەکەیان تاوتوێ کرد، تیشکیان خستە سەر ئەو ئاڵۆزییە ئەمنییانەی کە لەم دواییانەدا ڕوویان داوە و کاریگەرییان لەسەر سەقامگیریی ناوچەکە هەیە.
هەردوولا بە توندی سەرکۆنە و شەرمەزارکردنی ئەو هێرشانەیان کرد کە کراونەتە سەر هەرێمی کوردستان و باڵیۆزخانەی ئەمریکا لە بەغدا، هاوکات لە کۆتایی پەیوەندییەکەدا جەختیان لە گرنگیی مانەوە لە پەیوەندیی بەردەوامدا کردەوە بۆ هەماهەنگیی زیاتر لەسەر پرسە چارەنووسسازەکان.