وەزارەتی پێشمەرگەی حکومەتی هەرێمی کوردستان بە فەرمی ئەو دەنگۆیانەی ڕەتکردەوە کە باس لە بەشداریی هێزەکانی پێشمەرگە دەکەن لە هێرشکردنە سەر بارەگایەکی حەشدی شەعبی لە سنووری پارێزگای سەلاحەدین و ڕایگەیاند کە ئەو هەواڵانە دوورن لە ڕاستی و تەنها پڕوپاگەندەی میدیایین.
لە ڕاگەیەندراوەکەدا جەخت لەوە کراوەتەوە کە هێزی پێشمەرگە بە هیچ شێوەیەک بەشێک نییە لەو گرژی و ململانێ سەربازییانەی ئێستا لە ناوچەکەدا دەگوزەرێن و بەشداری هیچ جۆرە کردەوەیەکی سەربازی دژ بە هیچ لایەنێک نەکردووە، بەڵکو وەک هێزێکی نیشتمانی دوورە لەو کێشمەکێشانە.
وەزارەتی پێشمەرگە ئەرکی سەرەکی هێزەکانی بۆ پاراستنی ئاسایش و سەقامگیری ناوچەکە گەڕاندەوە و ئاماژەی بەوە کرد کە ئەوان پابەندن بە هەماهەنگی و کاری هاوبەش لەگەڵ هێزە ئەمنییەکانی عێراق بۆ ڕووبەڕووبوونەوەی مەترسییەکان، نەک تێوەگلان لە ململانێی ناوخۆیی و لاوەکی.