وەزارەتی بازرگانی عێراق بە فەرمی خزمەتگوزاری زیادکردنی منداڵانی خوار تەمەنی ١٢ ساڵی بۆ سەر کارتی ئەلیکترۆنیی بەشەخۆراک ڕاگەیاند.
ئەم هەنگاوە نوێیە لە چوارچێوەی پلانی حکومەت دێت بۆ بەدیجیتاڵکردنی تەواوی خزمەتگوزارییە گشتییەکان و کەمکردنەوەی ئەو ڕۆتینە بێزارکەرەی کە ساڵانێکی زۆرە هاووڵاتییان لە فەرمانگەکانی تەمویندا پێوەی دەناڵێنن و دەبێتە هۆی دروستبوونی قەرەباڵغییەکی زۆر لە کاتی مامەڵەکاندا.
تاڵیب حەسەن نیعمە بەڕێوەبەری گشتی فەرمانگەی پلاندانان ئاشکرای کرد کە لە ئێستادا خزمەتگوزارییەکە لە چەندین پارێزگای جیاوازی وەک سەڵاحەدین و واست و میسان و زیقار و بابل و دیوانییە و موسەننا لەگەڵ چەند ناوچەیەکی بەغدا چالاک کراوە.
وتیشی'' جێگەی دڵخۆشییە بۆ هاووڵاتییانی هەرێمی کوردستانیش کە هەردوو پارێزگای دهۆک و هەڵەبجە لە نێو ئەو لیستەدان کە ڕاستەوخۆ دەتوانن سوود لەم ئاسانکارییە نوێیە وەربگرن بۆ چاککردنی کارتی زانیارییەکانیان.''
ئەم پرۆسەیە بەشێکە لە ستراتیژییەکی گشتگیر کە وەزارەت گرتوویەتیە بەر بۆ ئەوەی سیستەمی دابەشکردنی خۆراک شەفافتر و خێراتر بکات. بەکارهێنانی تەکنەلۆژیای ئەلیکترۆنی لەم بوارەدا یارمەتیدەر دەبێت لە کۆنتڕۆڵکردنی بڕی ئەو خۆراکەی دابەش دەکرێت و ڕێگری دەکات لە هەر جۆرە دەستکارییەک لە لیستەکاندا، هاوکات کوالێتی پێشکەشکردنی خزمەتگوزارییەکە بە هاووڵاتییان بەرزتر دەکاتەوە و کاتێکی زۆریان بۆ دەگەڕێنێتەوە.
وەزارەتی بازرگانی دووپاتی دەکاتەوە کە پلانێکی تۆکمەیان هەیە تاوەکو لە قۆناغەکانی داهاتوودا ئەم خزمەتگوزارییە سەرجەم پارێزگاکانی دیکەی عێراق و هەرێمی کوردستان بگرێتەوە.
ئامانجی کۆتایی ئەوەیە کە هیچ خێزانێک ناچار نەبێت بۆ زیادکردنی منداڵەکانی یان گۆڕینی زانیارییەکان سەردانی مەیدانی فەرمانگەکان بکات، بەڵکو هەموو کارەکان لە ڕێگەی سیستەمێکی ناوەندیی پێشکەوتووەوە بە خێرایی ئەنجام بدرێن.