بەپێی دوایین زانیارییەکانی میدیای رۆژئاوای کوردستان، بەڕێوەبەرایەتیی ئاسایشی عەفرین بڕیاری قەدەغەی هاتووچۆی لە ناو شارەکەدا دەرکرد.
ئەمەش دوای ئەوە هات کە ژمارەیەک لە هاووڵاتییانی توندڕەوی عەرەب هێرشیان کردە سەر هاووڵاتییانی کورد و سووکایەتییان بە سیمبوولە نەتەوەییەکان و ئاڵای کوردستان کرد.
ئاسایشی شارەکە ڕایگەیاندووە” قەدەغەکە لە کاژێر ٨ی ئێوارەوە تاوەکو ٢ی بەرەبەیان بەردەوام دەبێت و ئەم هەنگاوەشی بۆ پاراستنی یەکڕیزیی نیشتمانی و رێگریکردن لە تێکدانی سەقامگیریی ناوچەکە ناوە.”
لە لایەکی دیکەوە، هۆشداری توند دراوەتە هەموو ئەو کەسانەی سەرپێچیی رێنماییەکان دەکەن و جەخت لەوە کراوەتەوە کە رێکاری یاسایی بەرامبەر هەر کەسێک دەگیرێتەبەر کە ئاشتیی کۆمەڵایەتی بخاتە مەترسییەوە.
ئەم ئاڵۆزییانە لە کاتێکدا سەری هەڵدا کە ژمارەیەک لە خێزانە کوردەکانی عەفرین لە کاتی گەڕانەوەیان لە ئاهەنگی نەورۆزی حەلەب، لەلایەن گروپێکەوە رێگرییان لێکرابوو و ئۆتۆمبێلەکانیان شکێنرابوو، ئەوەش کاردانەوەی لێکەوتەوە و ئاسایشی ناچار کرد بۆ کۆنتڕۆڵکردنی دۆخەکە داوا لە دانیشتووان بکات پابەندی بەهاکانی پێکەوەژیان بن و رێز لە سیمبوولەکان بگرن.