شارەزای کەشناسی، ڕایگەیاند'' ئەمڕۆ سێشەممە ٣١ی ئاداری ٢٠٢٦، ناسەقامگیرییەکی لاواز لە بەرگەهەوای ناوچەکەدا بەردەوام دەبێت، بەتایبەت لە نێوان کاتەکانی دوای نیوەڕۆ بۆ ئێوارە کە ئەگەری دروستبوونەوەی هەورەبروسکە و تاوەبارانی بەخوڕ لە چەند ناوچەیەکی جیاواز هەیە.''
ئاراس جەبار، ئاماژەی بەوەشکرد، ئەم بارانبارینە زیاتر ناوچەکانی سنووری پارێزگای سلێمانی، هەڵەبجە، هەولێر، دهۆک و هەردوو ئیدارەی سۆران و ڕاپەڕین دەگرێتەوە، بەڵام لە کاتەکانی ئێوارەوە کاریگەری ئەو شەپۆلە کۆتایی پێدێت و ئاسمان بەرەو ساماڵبوون دەچێت، ئەمەش ئاماژەیە بۆ کۆتاییهاتنی قۆناغی بارانبارینە ناوبەناوەکانی ئەم دواییە.
بۆ سبەی چوارشەممە ١ی نیسانی ٢٠٢٦، پێشبینی دەکرێت کەشوهەوا بە تەواوی جێگیر ببێت و ئاسمانی هەرێم بە زۆری ساماڵ بێت، هاوکات پلەکانی گەرما بەراورد بە ئەمڕۆ ٤ تا ٥ پلە بەرزدەبنەوە و خێرایی با لەسەرخۆ دەبێت، ئەم گۆڕانکارییەش کەشێکی گونجاو و سەقامگیر بۆ ناوچەکە دەگەڕێنێتەوە.