شێروان دووبەردانی، پەرلەمانتاری فراکسیۆنی پارتی لە بەغدا ڕایگەیاند'' محەمەد شیاع سوودانی، بەڵێنی داوە لەم هەفتەیەدا کۆتایی بە کێشەی مووچەی مانگی سێی فەرمانبەرانی هەرێم بهێنێت و پارەکە ڕەوانە بکات.''
بە وتەی دووبەردانی، ئەم بەڵێنەی سوودانی لە کۆبوونەوەیەکدا بووە لەگەڵ شاندی پارتی بە سەرۆکایەتی فازڵ میرانی. سەبارەت بە کێشەی ١٢٠ ملیار دینارەکە و ناکۆکییەکانی وەزارەتی دارایی، ئاماژەی بەوە کرد کە تەیف سامی، وەزیری دارایی عێراق، گڵۆپی سەوزی بۆ ناردنی مووچە هەڵکردووە و ڕایگەیاندووە'' پابەندی بڕیارەکانی سەرۆکوەزیران دەبێت و هەر کاتێک فەرمانی ناردنی پارەکە بدرێت، ڕەوانەی دەکات.''
ئەو پەرلەمانتارە تیشکی خستە سەر خاڵێکی گرنگ و وتی" داهاتی سەرجەم مەرزەکانی عێراق نەگەیشتووەتە ٣٢٠ ملیار دینار، بۆیە ناكرێت داوای ١٢٠ ملیار تەنیا لە هەرێم بکرێت، سوودانیش بەڵێنی داوە ئەم بابەتە بە هەند وەربگرێت و نەیکاتە ڕێگر لەبەردەم مووچەی خەڵک."
چاوەڕوان دەکرێت دوای تەواوبوونی دابەشکردنی مووچەی فەرمانبەرانی عێراق لە دوو ڕۆژی داهاتوودا، ڕاستەوخۆ پڕۆسەی ناردنی پارەی مووچەی هەرێم دەست پێ بکات.