شارەزایەکی کەشناسی پێشبینی دەکات سبەینێ پێنجشەممە ٩/٤/٢٠٢٦ نمەباران لە زۆربەی ناوچەکانی هەرێم دەبارێت و لەهەندێ شوێن هەورە بروسکە و تەرزەش دەبێت.

ئاراس جەبار، شارەزای کەشناسی رایگەیاند، سبەی پێنجشەممە ئاسمانی هەرێم بە گشتی لە قۆناغی نیمچە هەور بۆ هەوری تەواو دەبێت. لە بەیانییەوە لە ناوچە سنورییەکانی پارێزگای دهۆک و هەولێر، هەروەها ئیدارەکانی سۆران و راپەرین، بارانی مامناوەند و پچرپچر دەست پێدەکات، لە هەندێک شوێنیشدا باران بە خوڕ دەبێت و هەورە بروسکە و تەرزەش لەگەڵی دەبێت.

وتیشی: لە ناوچەکانی پارێزگای سلێمانی و هەڵەبجە، لە دوای نیوەڕۆ تا ئێوارە، ئەگەری دروستبوونی هەورە بروسکە و بارانی کورتخایەن هەیە. لە پارێزگای کەرکوک و ئیدارەی گەرمیان کەشوهەوا بە گشتی جێگیر دەبێت.

بە پێی ئەو پێشبینییە لە ئێوارەدا کاریگەریی نا جێگیری کەش لە زۆربەی ناوچەکان لاواز دەبێت و کەش بەرەو جێگیری دەچێت، بەڵام لە ناوچە شاخاوییەکانی سنوری پارێزگای دهۆک و زاخۆ بارانی مامناوەند و پچرپچر تا شەو بەردەوام دەبێت.

ئاراس جەبار ئاماژە بەوە دەکات کە پلەکانی گەرما بەراورد بە ئەمڕۆ جێگیر دەبن، بەڵام لە دهۆک و هەولێر نزیکەی ٢ پلە نزمدەبنەوە. خێرایی با لە نێوان ١٠–٢٠ کم/کاتژمێر دەبێت و ئاراستەی بایش لە گۆڕاندا دەبێت