نوسەری بواری دەروونی، چارەسەرکاری فیزیایی و پێشکەشکار سیدۆ مۆرگان، شەوی ڕابردوو لە لاپەڕەی خۆی لە تۆڕی کۆمەڵایەتی فەیسبووک پەیامێكی سەبارەت بە دەست لە کارکێشناوەی لە کەناڵی ئاڤا بڵاوکردەوە.
هەینی، ١٠ نیسان ٢٠٢٦، لە نامەی دەست لەکار کێشانەوەکەیدا هاتووە لە کەناڵی ئاڤا "بۆم ڕوون بوویەوە ئەم دامەزراوەیە خاوەنی ئیدارەیەكی لاواز و چەقگەرایە و تەنیا سەرۆكی دەزگاكە بڕیار لە كۆی شتەكان دەدات، ئەویش بە نا دروستی ولەسەر بنەمایەكی زۆر میزاجی خاڵی لە ئەتەكییەت و زمان و پاراوی لە گوفتار و ڕەفتاردا من راستەوخۆ و ناڕاستەوخۆ هەوڵمدا وەك هاو تەمەنێكی خۆم ڕاستی بكەمەوە بەڵام سودی نەبوو".
پێشکەشكارەکەی پێشووی ئاڤا چەند زانیارییەکی لە بارەی بە شێوازی کارکردنی کەناڵەکەوە بڵاوکردوەتەوە و وتویەتی "لە كاتی روماڵی رۆداوەكانی كوردستان، تەنانەت داوام كرد كە پێویستە زۆر چڕتر لەسەر هێوركردنەوەی دەروونی خەڵكی ئیش بكەین، بەڵام نەك بەوە ڕازی نەبوون بگرە سیاسەتی سەرۆكی دامەزراوەكە لەپێناو ڤیو زیاتر ئیشی لەسەر ترساندنی گەلی كورد دەكرد، هەواڵی نابەجێ و شۆكهێنەر و ترسێنەر لە نیوە شەوان، نەبوونی پلان بۆ ئارامكردنەوەی دەروونی خەڵكی، وە بڵاوكردنەوەی دەنگی درۆن و موشەكەكان بە شێوەیەكی زۆر ناپرۆفیشناڵ و نادروست، قسەكردن لەگەڵ منداڵ لە كاتی شەهیدبوونی دایك و باوكیان، ناچاركردنی خەڵكی لە پشت كامێراوە بۆ كروزانەوەی زیاتر و گریان لەكاتی لافاوەكەی چەمچەماڵ و زۆر شتی تر".
لە کۆتایی پەیامەکەیدا سیدۆ مۆرگان نوسیویەتی "من داوا لە هەموو ئەو لایەن و كەسانە دەكەم ئەم دامەزراوەیەیان دامەزراندووە، ئەم كەناڵە خاوەنی ستافی تەكنیكی زۆر دڵسۆزە، كەسانێك كە كوڕ و كچی ئەم وڵاتەن، زۆربەیان زیرەك و لێهاتوون، بەلام لە دەستێكی ئەمیندا نین و بە ئاڕاستەیەكی هەڵەدا دەبرێن".
دەقی پەیامەکەی سیدۆ مۆرگان:
سەبارەت بە کارکردنم لە ئاڤا
بابەت: دەست لەكاركێشانەوە
پاش رێز و سڵاو
سەرەتا دەمەوێت سوپاسی ئەو شەست و هەشت كەسە بكەم كارمەندی ئاڤان و ئەمرۆ لە رێگای نامەو دەنگەكانیانەوە نیگەرانی خۆیان لە دەستلەكاركشانەوەی من بۆ دەربڕیوم. ئەمە بۆ من جێگای سوپاس و پێزانینە. رێزم بۆ هەموو ئەو كەسانەش هەیە كە هەوڵیاندا ئەم دەست لەكاركێشانەوەیەی من لە بێدەنگیدا بمێنێتەوە بە نیەتێكی باش بێت یان نا ویستییان من هیچ نەڵێم.
داوای لێبوردن لەوانە دەکەم.
لە مێژوی كاركردنم لە ماوەی بیست ساڵی رابردوو ئەمە یەكەمجارە من دەستلەكاركێشانەوەم خۆم بە ئاشكرا بەمجۆرە پێشكەشی دەزگایەك دەكەم. بەڵام من باوەڕم وایە ئەمە بابەتێكە هەتا زیاتر تێكنەدراوە خۆم بە ڕاستی و دروستی شتەكان بەیان بكەم. چونكە متمانەیەكی پێویستم نیە بە گێڕانەوەی دەم بەدەمی وردەكارییەكان لە پاش خۆم لەو دامەزراوەیە و لای هاوڕێ و ناسراوەكانم لە ناوەوە و دەرەوەی كوردستان و لە هەموو پلاتفۆرمەكان.
لە مانگی شەشی ساڵی دوو هەزار و بیست و چوار من بە فەرمی لە دامەزراوەی ئاڤاوە بانگهێشتی فەرمیم پێگەیشت كە بڕیاریان داوە لەبەر ئەوەی كەناڵێكی خێزانییان داناوە، حەز دەكەن من وەك پسپۆڕێكی دەروونی بەرنامەیەكی دەروونی پێشكەش بكەم و بە لایەنی كەمەوە هەر وەرزرێك بەرنامەیەك ئامادە بكەم. ئەمە بۆ من جێگای پێزانین بوو كە لەناو میدیایەكی كوردیدا بەم گرنگییەوە لەم بابەتە دەڕواندرێت و منی بۆ ئەم كارە دەستنیشان كردووە، بە هەموو تێبینییەكانمەوە لەبەر ئەوەی باوەڕم وایە نوێگەری و ریفۆرم لەناو ئەم كۆمەڵگا لەناو خودی دامەزراوەیەكی سیستیماتك و رێكخراودا باشتر ئەنجام دەدرێت ، چی باشتر لە كەناڵێك كە لەوانەیە بچێتە ماڵی بەشێكی زۆری تاكەكانی كۆمەڵگای كوردی! ئەمە هیوای پێدام بۆ ئەوەی لەوانەیە بتوانین مەعریفەیەكی دەروونی و زانستی نوێ بەم خەڵكە و بەم كۆمەڵگا بریندارە ببەخشین بە تایبەتی لە بوارەكەی خۆمدا. ئەمە ئەو بابەتە بوو لەسەری رێككەوتین بەڵام ئەو ئامانجە لە بیركرا و كەمكەم دەركەوت ئەوەی گرنگە رێژەی بینینە و هیچی تر ئیتر بە هەر بەها و نرخێك بێت، لێرەدا جیهانبینییەكانمان بەر یەكتری كەوتن.
پێش گەڕانەوەم بە وردی كە هەموو شتێك دۆكیومێنت كراوە لای من، كۆمەڵێك مەرجم هەبوون و ئەوان بە مەرجەكان رازی بوون. گرنگترینییان ئەوە بوو كە وتم ئەركی من تەنیا ئامادە كردن و پێشكەشكردنی بەرنامەیەكی دەروونییە نەك كارمەندێكی ئاسایی كە رۆژانە لەناو دامەزراوەكەدا بێت. مەرجەكان هەموی قبوڵكران و وتیان ستۆدیۆمان بۆ ئامادە كردویت و بە زوترین كات بگەڕێوە ( بە ئێستاشەوە ستۆدیۆكە تەواو نەبووە) كاتی تۆمار كردن لەوێ بەرنامەكەت تۆمار بكە.
پاش گەڕانەوەم، وردتر بۆم ڕوون بوویەوە ئەم دامەزراوەیە خاوەنی ئیدارەیەكی لاواز و چەقگەرایە و تەنیا سەرۆكی دەزگاكە بڕیار لە كۆی شتەكان دەدات، ئەویش بە نا دروستی ولەسەر بنەمایەكی زۆر میزاجی خاڵی لە ئەتەكییەت و زمان و پاراوی لە گوفتار و ڕەفتاردا من راستەوخۆ و ناڕاستەوخۆ هەوڵمدا وەك هاو تەمەنێكی خۆم ڕاستی بكەمەوە بەڵام سودی نەبوو. كەسانی زۆر نا پسپۆڕ دیاری دەكات كە خۆیان لە وردەكاری بەرنامەكان هەڵقورتێنن. كەسانێك كە هیچ پسپۆڕییەكیان نیە و دەسەڵاتێكی وەهایان پێدراوە كە پێیان وابێت دەتوانن هەموو شت بزانن و هەموو شت بكەن. بەڵام مرۆڤ گەلێكی بێ ئاست و بێ مەعریفەن و لە هەر دامەزراوەیەكی تردا بوون ئەدایان لاواز بووە و لە ئاڤادا كۆكراونەتەوە و دەسەڵاتییان پێدراوە، ئەمە تا سنورێك بەشێكیان نە لە نیشتیمان تێدەگەن نەك لە خەبات نە لە كوردایەتی وە نە لە كوردستانیبوون. وە ئەمە بۆم جێی پرسیار بوو كە بۆ چی ئەمانە لێرە كۆ دەبنەوە وە ئەمە ئازاری دەدام. بە تایبەتی لەم خاڵەدا كە ئیخوانیبوون لەوێ زاڵترە لە كوردستانیبوون!
بە فشارێكی زۆر و بە هەوڵێكی زۆر هەرچۆنێك بێت بەرنامەی گەشتی چارەسەرمان دروستكرد كە دەستپێك هەتا كۆتاییەكەی دژایەتی دەكراین. وردە وردە روئیایەك دروست بوو كە ئەم كەناڵە ئەسڵەن نەك نایەوێت خێزانی بێت، بگرە هەڵەی زۆر ستراتیژی ئەنجام دەدات، بە تایبەتی من كەسێك بووم زۆربەی كارمەندەكان رێزیان دەگرتم و خۆشیان دەویستم و خۆیان بۆم دەكردەوە، بەم پێیە ئاگاداری زۆربەی هەڵە ستراتیژییە قوڵەكان بووم لەو دیو پەردەكانەوە، بە تایبەتی لە كاتی روداوە ناخۆشەكاندا، ناچار كردنی خەڵكی بە گریان لەبەردەم كامێرا، زەق كردنەوەی شتانێكی نابەجێ و ڕوكەش لە بابەتەكاندا، كاركردن لەسەر كۆنترۆڵكردنی دەروونی كارمەندەكان، سوكایەتی و ئیهانە و بڵاوكردنەوەی ترس و خۆبەگەورەزانی سەرۆكی دەزگا و راوێژكارەكەی ، جنێودان و ئیهانەكردنی كارمەند لەبەردەم هاورێكانی لە لایەن سەرۆكی دامەزراوەكەوە ( كە ئەمە جێی نیگەرانی قوڵە، هەرچەند كەسایەتی من بەوجۆرە بووە هیچكات رێی بە خۆی نەداوە لەبەردەم مندا بەو جۆرە مامەڵە بكات بەڵام چەند كەس دەتوانێت وەك من بێت!) ئەمە بەدەر لە هەڵەی زەقی دەروونی زۆر هەر لە زمانی بەشێك لە پێشكەشكارەكان بۆ شێوازی ریپۆرت كردنی بەشێك لە ڕوداوەكان. ئەمە وای كرد بەردەوام من وەك پسپۆڕێكی دەروونی تێبینی خۆم لە رێگای پەیوەندییەكانمەوە بە لێپرسراوەكان بدەم، بەڵام هیچ كەسێك لەو دەزگایە گوێی لێناگیرێت و هەموو شتێك بە میزاجی شەخسی سەرۆكی دامەزراوەكە دەچێتە پێشەوە كە فەلسەفەی ئەو دامەزراوەیە بوو بە ئیش كردن لەسەر بنەمای ترس، بێمنەتی، ئیهانەكردن، تەكەتولات و ماستاوكردن و خۆ بچوككردنەوە و زۆر شتی تر كە ئیشی من نیە لێرەدا بیانڵێم.
ئامانجی من خزمەتكردنی خەڵكی بوو لە رێگای پرۆگرامێكی دەروونی ئاست بەرزەوە، كە دەست بخرێتە سەر برینەكان، ئێمە هەمومان دەمانەوێت ئەم وڵاتە پێشبكەوێت و ئەم گەلە بریندارە زیاتر لەبارەی بوون و ئازار و نەهامەتی خۆیەوە مەعریفەی هەبێت، بەڵام كەمكەم ئەم دامەزراوەیە بەرەو رۆكەشگەڕاییەكی پەتی رۆیشت كە تەنانەت گرفتی قوڵیان بۆ بەرنامە و پرۆژەكانی من دروستدەكرد هەتا ئەو سنورەی كە ڕاستەوخۆ دەستیان كرد بەوەی كە ئەم كۆمەڵگا پێویستی بە بەرنامەی دەروونی نیە! كە ئەمە شۆكی كردم.
بەم دواییانەش لە كاتی روماڵی رۆداوەكانی كوردستان، تەنانەت داوام كرد كە پێویستە زۆر چڕتر لەسەر هێوركردنەوەی دەروونی خەڵكی ئیش بكەین، بەڵام نەك بەوە ڕازی نەبوون بگرە سیاسەتی سەرۆكی دامەزراوەكە لەپێناو ڤیو زیاتر ئیشی لەسەر ترساندنی گەلی كورد دەكرد، هەواڵی نابەجێ و شۆكهێنەر و ترسێنەر لە نیوە شەوان، نەبوونی پلان بۆ ئارامكردنەوەی دەروونی خەڵكی، وە بڵاوكردنەوەی دەنگی درۆن و موشەكەكان بە شێوەیەكی زۆر ناپرۆفیشناڵ و نادروست، قسەكردن لەگەڵ منداڵ لە كاتی شەهیدبوونی دایك و باوكیان، ناچاركردنی خەڵكی لە پشت كامێراوە بۆ كروزانەوەی زیاتر و گریان لەكاتی لافاوەكەی چەمچەماڵ و زۆر شتی تر كە هەمویم پێدەگەیشتەوە و داوام لێدەكرا من سەرنجم هەبێت و تێبینییەكانم بگەیەنم بە سەرەوە، چونكە دەیانزانی من كەسایەتییەكی بەهێزم هەیە و منم كە دەتوانم قسە بكەم و دەنگ هەڵبڕم، هەموو ئەمانە ئەنجامدران و بێ سود بوون.
لەبەر ئەوە من داوا لە هەموو ئەو لایەن و كەسانە دەكەم ئەم دامەزراوەیەیان دامەزراندووە، ئەم كەناڵە خاوەنی ستافی تەكنیكی زۆر دڵسۆزە، كەسانێك كە كوڕ و كچی ئەم وڵاتەن، زۆربەیان زیرەك و لێهاتوون، بەلام لە دەستێكی ئەمیندا نین و بە ئاڕاستەیەكی هەڵەدا دەبرێن. ئێمە هاتین ئاشتی لەم وڵاتە بڵاو بكەینەوە، پەرە بە كوردبوون بدەین، كەسایەتی تاكی كورد بەهێزتر بكەین. ئینتیما زیاتر بكەین، روئیاكان فراوانتر بكەین، بەڵام هەموو شتێك خەریكە پێچەوانە دەبێتەوە. هەتا ئەم دامەزراوەیەك نوقم نەبووە رزگاری بكەن و بیخەنە سەر رێگایەكی دروست.
تێبینی: گرێبەستی من مانگی حەوت ی ئەمساڵ كۆتایی پێدێت لەگەڵ ئاڤا بەڵام لەمرۆوە ئەمە وەك دەستلەكێشانەوەی فەرمی سەیر بكەن.
وێنەیەک لە بڵاوکراوەکەی لە تۆڕی کۆمەڵایەتی فەیسبووک: