دوای هێرشەکانی ٢٤ کاتژمێری رابردوو بۆ سەر هەرێمی کوردستان کە لە ئەنجامدا "غەزاڵ مولان شەهید بوو و دوو پێشمەرگەی دیکەش بریندار بوون"، هاوپەیمانی هێرزە سیاسیەکانی ڕۆژهەڵاتی کوردستان دەڵێت "هێرش لە کاتی ئاگربەستدا، نیشانەی بنبەستی سیاسی و سوپایی ڕژێمی ئێرانە".
چوار شەممە، ١٥ نیسان ٢٠٢٦، لە راگەیاندراوەکەدا هاتووە "کۆماری ئیسلامیی ئێران، جارێکی دیکە لە ڕێگەی هێرشی درۆنییەوە، سەروەریی خاکی هەرێمی کوردستانی پێشێل کرد و کامپی پەنابەرانی سیاسیی ڕۆژهەڵاتی کوردستانی بە ئامانج گرتەوە. ئەم هێرشانە کە لە کاتی ڕێککەوتنی ئاگربەستدا کران، جارێکی دیکەپەردەی لەسەر ناوەڕۆکی ڕاستەقینەی ڕژێمێک لادا کە هیچ کات بڕوای بە ئاشتی و چارەسەری سیاسی نەبووە و سەرکوت، زەبروزەنگ و تیرۆر کۆڵەکەی سەرەکیی مانەوەیەتی. ئەم پەلامارانە نەک نیشانەی هێز نین، بەڵکوو دەرخەری ئەو ڕاستییەن کە ڕژێم لە ئاست ئیرادەی گەلەکەمان و ئەو بنبەستە سیاسی و نیزامییەی کەوتووە، تووشی شڵەژان و نائومێدی بووە".
هاوپەیمانێتیەکە جەخت دەکاتەوە کە "ڕژێمی ئێران دەبێت بزانێت کە تیرۆر، تۆقاندن و درۆنباران، ناتوانێت ئیرادەی نەتەوەیەک بۆ بەدیهێنانی مافە ڕەواکانی سست بکات و ئەم هێرشانە یەکڕیزیی هێزە سیاسییەکان و جەماوەری کوردستان بۆ کۆتایهێنان بە ستەمکاری و داگیرکاری بەهێزتر دەکات".
دەقی راگەیاندراوەکەی هاوپەیمانی هێزە سیاسیەکانی ڕۆژهەڵاتی کوردستان:
"هێرش لە کاتی ئاگربەستدا، نیشانەی بنبەستی سیاسی و سوپایی ڕژێمی ئێرانە
خەڵکی تێکۆشەری کوردستان!
ڕای گشتی و ناوەندە نێودەوڵەتییەکان!
کۆماری ئیسلامیی ئێران، جارێکی دیکە لە ڕێگەی هێرشی درۆنییەوە، سەروەریی خاکی هەرێمی کوردستانی پێشێل کرد و کامپی پەنابەرانی سیاسیی ڕۆژهەڵاتی کوردستانی بە ئامانج گرتەوە. ئەم هێرشانە کە لە کاتی ڕێککەوتنی ئاگربەستدا کران، جارێکی دیکەپەردەی لەسەر ناوەڕۆکی ڕاستەقینەی ڕژێمێک لادا کە هیچ کات بڕوای بە ئاشتی و چارەسەری سیاسی نەبووە و سەرکوت، زەبروزەنگ و تیرۆر کۆڵەکەی سەرەکیی مانەوەیەتی. ئەم پەلامارانە نەک نیشانەی هێز نین، بەڵکوو دەرخەری ئەو ڕاستییەن کە ڕژێم لە ئاست ئیرادەی گەلەکەمان و ئەو بنبەستە سیاسی و نیزامییەی کەوتووە، تووشی شڵەژان و نائومێدی بووە.
بەداخەوە، لە نوێترین شەپۆلی ئەم هێرشانە بۆ سەر کامپەکانی "ئازادی”ـی حزبی دیموکرات و "سوورداش”ـی کۆمەڵەی زەحمەتکێشان، دوو پێشمەرگە بریندار بوون و "غەزاڵ مولان”، کچە پێشمەرگەی کۆمەڵەی زەحمەتکێشان، شەهید بوو.
هاوپەیمانیی کوردستانی ئێران ڕادەگەیەنێت کە بە ئامانجگرتنی شوێنی ژیانی خەڵکی سڤیل و پەنابەران، پێشێلکردنێکی زەقی یاسا نێودەوڵەتییەکان و هەروەها کۆنڤانسیۆنی ژنێڤە. هاوپەیمانیی هێزە سیاسییەکانی کوردستانی ئێران داوا لە حکومەتی فیدراڵیی عێراق، ویلایەتە یەکگرتووەکانی ئەمریکا و ڕێکخراوی نەتەوەیەکگرتووەکان دەکات، تەنیا بە ئیدانەکردنی ئەو هێرش و دەستدرێژییانە نەوەستن و هەنگاوی کردەیی بۆ ڕاگرتنی ئەم پەلامارانە بنێن کە هەم بێڕێزی و پێشێلکردنی سەروەریی عێراق و هەرێمە و هەم بەهێندنەگرتنی یاسا نێودەوڵەتییەکانە.
ڕژێمی ئێران دەبێت بزانێت کە تیرۆر، تۆقاندن و درۆنباران، ناتوانێت ئیرادەی نەتەوەیەک بۆ بەدیهێنانی مافە ڕەواکانی سست بکات و ئەم هێرشانە یەکڕیزیی هێزە سیاسییەکان و جەماوەری کوردستان بۆ کۆتایهێنان بە ستەمکاری و داگیرکاری بەهێزتر دەکات.
هاوپەیمانیی هێزە سیاسییەکان وێڕای نوێکردنەوەی بەڵێن لەگەڵ شەهیدانی ڕێگای ڕزگاری ڕادەگەیەنێت کە هەتا ڕووخانی ڕژێمی کۆماری ئیسلامی و بەدیهێنانی مافە نەتەوایەتییەکانی گەلەکەمان، لە خەبات و تێکۆشان بەردەوام دەبێت".
هاوپەیمانیی هێزە سیاسییەکانی کوردستانی ئێران ڕایگەیاند، هێرش لە کاتی ئاگربەستدا، نیشانەی بنبەستی سیاسی و سوپایی ڕژێمی ئێرانە، تا ڕووخانی ڕژێمی کۆماری ئیسلامی و بەدیهێنانی مافە نەتەوایەتییەکانی گەلەکەمان، لە خەبات و تێکۆشان بەردەوام دەبین.
دوێنی و ئەمڕۆش، ڕژێمی ئێران بۆردوومانی بۆسەر هەرێمی کوردستان و بەتایبەت پەنابەرانی ڕۆژهەڵاتی کوردستان دەستپێکردەوە، بە هۆیەوە ژنە پێشمەرگەیەکی کۆمەڵەی زەحمەتکێشانی کوردستان شەهیدبوو و دوو کەسی دیکەش برینداربوون.
لە بارەی هێرشەکانی ڕژێمی ئێرانەوە، هاوپەیمانیی هێزە سیاسییەکانی کوردستانی ئێران ڕاگەیاندراوێکی بڵاوکردەوە و دەقەکەی بەمشێوەیەیە: