وتەبێژی سەرۆکایەتی هەرێمی کوردستان، دڵشاد شەهاب، لە پەیامێکدا سەبارەت بە دۆسیەی لاهور شێخ جەنگی ڕایگەیاند" کە بڕیاردان لە داوای گواستنەوەی کەیسێک لە دادگایەک بۆ دادگایەکی تر، پرسێکی تەواو دادوەرییە و تەنها لەلایەن دادگا پەیوەندیدارەکانەوە یەکلایی دەکرێتەوە".
ئەو لە لێدوانێکدا بۆ ماڵپەڕی سەرۆکایەتی هەرێم ئاماژەی بەوەدا کە لە ماوەی ڕابردوودا، هەندێک باس و گفتوگۆ لە دەزگاکانی ڕاگەیاندندا سەبارەت بە ڕوداوەکانی مانگی ئاب لە لالهزاری سلێمانی و هەڵوێستی سەرۆکایەتی هەرێم لە پرۆسەی دادگاییکردن بڵاوکراونەتەوە.
دڵشاد شەهاب جەختی کردەوە کە سەرۆکایەتی هەرێم هیچ جۆرە دەستتێوەردان یان فشارێک لەسەر پرۆسەی دادوەری ناکات، و پێویستە هەموو کەیسەکان بە ڕێڕەوی یاسایی و لەسەر بنەما دروستەکانی دادگاییکردن بەڕێوە بچن، هەروەها مافی تۆمهتباران و گیراوان بەپێی یاسا پارێزراو بێت.
هەروەها دووپاتی کردەوە کە دادگاکان دەبێت لە کاتی یاسایی خۆیاندا و بەپێی ڕێکارە دیاریکراوەکان بڕیار لەبارەی ئەم دۆسیەیە بدەن.
لە کۆتاییدا، وتەبێژی سەرۆکایەتی هەرێم ئاماژەی بەوەدا کە سەرۆکایەتی هەرێم هەمیشە پابەندە بە پاراستنی یاسا و دامەزراوەکان و ڕێزگرتن لە بنەمای جیاکردنەوەی دەسەڵاتەکان و سەربەخۆیی دەسەڵاتی دادوەری.