کەشناسێکی کورد گۆڕانکاری نوێ و دواین پێشبینیەکان لەبارەی کەشوهەوای رۆژانی داهاتوو دەخاتەڕوو و ئاشکرای دەکات کە " بارانبارین لە ئەمڕۆوە دەستپێدەکات ولە رۆژانی سێشەممە وچوارشەممە بارانی بەهێز و تەرزە دەبارێت".

بە وتەی ئاراس جەبار شارەزای کەشناسی ئەمڕۆ یەکشەمە، لە کاتەکانی دوای نیوەرۆدا لە شوێنە جیاوازەکان ئەگەری دروستبوونی هەورە بروسکە و تاوە بارانی کورتخایان هەیە. لە کاتەکانی ئێوارەدا کەش تا ڕادەیەک جێگیر دەبێتەوە، بەڵام لە شەودا، بە تایبەتی لە نێوان نیوەی شەو بۆ بەرەبەیانی دووشەمە ، پێشبینی دەکرێت زنجیرەیەک هەوری بەهێز لە ڕۆژئاواوە بە ئاراستەی ناوچەکانی هەرێمی کوردستان بێت، کە هاوشێوەی هەورە بروسکە، باران و تەرزەی توند لەگەڵ خۆیدا دەهێنێت.

راشیگەیاند" لەو ماوەیەدا، لە زۆربەی ناوچەکان ئەگەری شەستە باران و هەورە بروسکەی بەهێز هەیە، بە تایبەتی لە ناوچەکانی ناوەندی پارێزگای هەولێر، کەرکوک و ناوچەکانی گەرمیان کە توندتر دەبن بە بەراورد بە ناوچەکانی تر. لە بەیانی دووشەمەوە، کاریگەری ئەم نائاستەنگییە کەم دەبێتەوە و زۆربەی کاتەکان کەش جێگیر دەبێت، هەرچەندە لە دوای نیوەرۆ بۆ ئێوارە لە هەندێ شوێندا ئەگەری چالاکبوونی دووبارەی هەورە بروسکە و باران هەیە."

ئاماژە بەوەشدەکات کە بەپێی دواین گۆڕانکاریەکان، بۆ رۆژانی سێشەمە و چوارشەمە ، ئەگەری گەڕانەوەی نائاستەنگییەکان هەیە، کە دەبێتە هۆی چالاکبوونی هەورە بروسکە، تەرزە و شەستە باران لە زۆربەی ناوچەکان.