بەڕێوبەری نەخۆشخانەی منداڵانی فێرکاری لە سلێمانی، دکتۆر کۆیان زاهیر لە لێدوانێکی رۆژنامەوانیدا لە بارەی بڵاوبوونەوەی ڤایرۆسێک لە ناو منداڵاندا رونکردنەوە دەدات.
سێ شەممە، ٢٨ نیسان ٢٠٢٦، دکتۆر کۆیان زاهیر رایگەیاند " ئەو ڤایرۆسەی بڵاوبووەتەوە لە منداڵێکەوە بۆ منداڵیکی تر دەگوازرێتەوە، هەفتەی یەکەمی ڤایرۆسەکە کەمێک قورس دەبێت، چونکە منداڵەکە خواردنی بەتەواوی کەم دەبێتەوە بەهۆی برینەکانی ناودەمییەوە و ماوەکەی نزیکەی ١٠ ڕۆژ دەخایەنێت".
بەڕێوبەری نەخۆشخانەی منداڵانی فێرکاری وتوشیەتی "ڤایرۆسەکە جێگەی مەترسی نییە و دڵنیایی بە دایکان و باوکان دەدەین، ڤایرۆسەکە قورس نییە و کەمترین منداڵ بەهۆی ڤایرۆسەکەوە داخڵی نەخۆشخانە دەکرێن، تەنها ئەو منداڵانە نەبێت کە بەهیچ جۆرێک خواردن ناخۆن و بێهێز بوون".
ڤایرۆسەکە لە ئێستادا لەناو منداڵاندا بڵاوبووەتەوە ڤایرۆسی دەم و دەست و قاچ، مەترسییەکی ئەوتۆی نییە و سووڕی نەخۆشییەکە نزیکەی ١٠ ڕۆژ دەخایەنێت.