بەپێی بڕیارێکی وەزارەتی بازرگانیی عێراق، لە مانگی نیسانەوە وەرگرتنی پارەی بەشەخۆراکی مانگانە لە هاوڵاتییان تەنها بە شێوازی "پارەدانی ئەلیکترۆنی” دەبێت و وەرگرتنی پارەی کاش لەلایەن بریکارەکانەوە قەدەغە دەکرێت.

ئەم بڕیارە کە لەسەر بنەمای ڕاسپاردەکانی ئەنجوومەنی وەزاری بۆ کاروباری ئابووری دەرچووە، ئامانج لێی ڕێکخستنی سیستەمی دارایی و کەمکردنەوەی مامەڵەی کاشە.

هاوکات لەگەڵ ئەم گۆڕانکارییەدا، لە ناو پەرلەمانی عێراق جووڵەیەک دەستیپێکردووە و ٩٣ واژۆ کۆکراوەتەوە بۆ هەڵوەشاندنەوەی بڕیاری بڕینی بەشەخۆراکی فەرمانبەران و هێزە ئەمنییەکان.

وەزارەتی بازرگانیش جەختی کردووەتەوە کە بڕینی بەشەخۆراک تەنها ئەو کەسانە دەگرێتەوە کە داهاتیان بەرزە، بۆ ئەوەی هاوکارییەکان بگەنە دەستی خەڵکی کەم دەرامەت، هاوکات وەزارەتی کار و کاروباری کۆمەڵایەتیش دەنگۆی بڕینی بەشەخۆراکی ئەو کەسانەی ڕەتکردەوە کە مووچەی چاودێریی کۆمەڵایەتی وەردەگرن.