سەرپەرشتیاری ئیدارەی سۆران، هەڵگورد شێخ نەجیب لە کۆنفرانسێکی رۆژنامەوانیدا دواین زانیاری سەبارەت بە گەڕان بە دوای ئەو سێ کەسەی هەینی رابردوو ئاشکرا دەکات کە کەوتنە رووباری گەلی عەلی بەگ و دووانیان منداڵبوون.
سێ شەممە، ٥ ئایار ٢٠٢٦، هەڵگورد شێخ نەجیب رایگەیاند "لەگەڵ بەرگریی شارستانی ڕێڕەوێکیان دروستکردووە بۆ ئەوەی لەڕێگەی حەفارەوە مەلەوانەکان زیاتر بتوانن بچنە قووڵایی ئاوی ڕووبارەکە و بگەڕێن بەدوای قوربانییەکان، بەڵام لەم وەرزەدا شەپۆلی ئاوەکە خێرایە و ئاوەکەش زۆر لێڵە هەربۆیە کاری ئەوان قورستر کردووە".
شەوی هەینی، ١ ئایار ئۆتۆمبێلێک بە ٥ سەرنشینەوە کەوتە ناو ڕووباری گەلی عەلی بەگ و دووان لە سەرنشینەکان کە دایک و باوکێک بوون ڕزگاریان بووە، بەڵام ٢ منداڵەکەیان کە تەمەنیان ٣ ساڵ و ٧ ساڵە لەگەڵ کچێکی ١٧ ساڵ کەوتنە ناو ڕووبارەکە و هێشتا بێسەرووشوێنن.