ژنێکی تەمەن ٤٣ وەک یەکەم توشبووی نەخۆشی تای خوێنبەربوون لە پارێزگای کەرکوک کەرەنتینە کراو خرایە ژێر چاودێری وردی پزیشکییەوە.

سەرچاوەیەکی تەندروستی کەرکوک بە سپی میدیای راگەیاند، نەخۆشەکە ئافرەتە و دانیشتووی یەکێک لە گوندەکانی سەر بە پارێزگای کەرکوکە، ئەو ئافرەتە دوێنێ بە نیشانەکانی نەخۆشییەکەوە سەردانی نەخۆشخانەی ئازادی کردووە.

بە پێی سەرچاوەکە نەخۆشەکە دەستبەجێ خراوەتە ژێر چاودێریی چڕ و کەرەنتینە کراوە، دوای وەرگرتنی نموونەی خوێن و ناردنی بۆ تاقیگەکانی بەغدا، کەمێک پێش ئێستا ئەنجامەکەی گەڕایەوە و دەرکەوت کە هەڵگری ڤایرۆسەکەیە و پشکنینەکەی پۆزەتیڤە.

ئاماژەی بەوەش کرد، لە ئێستا باری تەندروستی نەخۆشەکە جێگیرە و چارەسەری پێویست وەردەگرێت، سەبارەت بە هۆکاری تووشبوونەکەش، دەرکەوتووە کە ئەو ئافرەتە خاوەنی ئاژەڵ بووە و بەهۆی بەریەککەوتنی راستەوخۆ لەگەڵ ئاژەڵدا تووشی نەخۆشییەکە بووە.