ئەمڕۆ دووشەممە ١٨ی ئایاری ٢٠٢٦، نێچیرڤان بارزانی، سەرۆکی هەرێمی کوردستان لە چوارچێوەی سەردانە فەرمییەکەیدا بۆ ڤاتیکان، لەگەڵ کاردیناڵ پیێترۆ پارۆلین، سەرۆک وەزیرانی ڤاتیکان کۆبووەوە.
لە کۆبوونەوەکەدا پەرەپێدانی پەیوەندییەکان و دۆخی سیاسی و ئەمنیی عێراق تاوتوێ کران. سەرۆک وەزیرانی ڤاتیکان ستایشی پێگەی هەرێمی کوردستانی کرد وەک نموونەیەکی سەرکەوتووی پێکەوەژیانی ئاشتییانەی ئایین و پێکهاتە جیاوازەکان لە ناوچەکەدا.
هەر لە چوارچێوەی سەردانەکەدا، سەرۆکی هەرێمی کوردستان لەلایەن پاپا لیۆی چواردەیەم، پاپای ڤاتیکانەوە پێشوازی لێکرا. نێچیرڤان بارزانی لە دیدارەکەدا جەختی لەوە کردەوە، مەسیحییەکان بەشێکی ڕەسەن و دانەبڕاون لە ناسنامەی نیشتمانیی هەرێم.
وەک هێمایەک بۆ ئەم پێکەوەژیانە، سەرۆکی هەرێم تابلۆیەکی تایبەتی پێشکەش بە پاپا کرد کە لەلایەن هونەرمەندی کورد (شاناز جەمال)ـەوە دروستکراوە و گوزارشت لە کڵێسای نۆتەردامی پاریس دەکات لەسەر بەرمال و جاجمی کوردی.
ئەم سەردانە فەرمییەی سەرۆکی هەرێمی کوردستان تەنیا لە چوارچێوەی شاندە حکومی و دیپلۆماسییەکاندا نەبوو، بەڵکو ئیدریس نێچیرڤان بارزانیی کوڕی سەرۆکی هەرێمیش لەم سەردانەدا یاوەری باوکی بوو و ئامادەیی هەبوو، ئەمەش لە کاتێکدایە کە زۆرجار بەرپرسانی باڵای هەرێمی کوردستان لە گەشتە فەرمی و نافەرمییەکانیاندا بۆ دەرەوەی وڵات، منداڵەکانیان لەگەڵ خۆیاندا دەبەن.