بەرێوەبەرایەتی تەندروستی ئاژەڵ لە نوسراوێکدا چەندین رێنمایی و رێکاری قوربانیکردن بۆ خۆپاڕێزی لە نەخۆشی تای خوێن بەربوون بڵاودەکاتەوە و داوا دەکات هاوڵاتیان جێبەجێی بکەن.

دەقی نوسراوەکە:

ڕێکار و ڕێنماییه‌كانی قوربانیكردن بۆ خۆپاڕێزی لە نەخۆشی تای خوێن بەربوون

بەمەبەستی ڕێگریكردن لە سەرهەڵدان و بڵاوبونەوەی نەخۆشی بەتایبەتی( نەخۆشی تای خوێن بەربوون) كەلەئێستادا بڵاوبۆتەوە ، بەڕێوەچوونی مەڕاسیمی قوربانیكردن بە شێوازێكی تەندروست ،لەپێناو بەرژەوەندی گشتی و پاراستنی ژیانی هاووڵاتیان ،جەخت دەكەینەوە لە م ڕێكارە ڤێتێرنەری و ڕێنماییانەی خوارەوە بەمەبەستی جێبەجێ كردنیان و هەماهەنگی لایەنەپەیوەندارەكان ، پەیڕەوكردنیان لەلایەن هاووڵاتیانەوە وە بڵاوكردنەوەیان لە دەزگا ڕاگەیاندنەكان:

۱.لەڕۆژانی جەژنی قوربان سەربڕخانەكان كراوە بن بە ئامادەبوونی ستافی پزیشكی ڤێتێرنەری به‌مه‌به‌ستی پشكنینی ئاژه‌ڵ و گۆشتی قوربانی.

۲.ناوی سەربڕخانە كراوەكان و خشتەی كاتی كاركردن لە دەزگاكانی ڕاگەیاندن و یەكە ئیداریەكان ڕابگەیەنرێت بۆئاگاداری هاووڵاتیان.

۳.جەختكردنەوە و توند و تۆڵكردنەوەی ڕێكارەكانی پشكنینی پێش سەربڕین و دوای سەربڕینی ئاژەڵ و پشكنینی گۆشتی بەرهەم هاتوو.

٤. پەیڕەوكردنی ڕێنماییەكانی خۆپارێزی وە پاك و خاوێن ڕاگرتنی سەربڕخانەكان و دەوروبەری سەربڕخانەكان وە ڕشاندنیان بە دەرمانی تایبەت .

٥.پێویستە ئاژەڵ ساغ بێ و هیچ نیشانەیەكی نەخۆشی نەبێت. نابێت ئەو ئاژەڵەی كە گەنە( قرنە) ی پێوەیە سەرببڕێت.

٦.ده‌بێت ئاژه‌ڵه‌كه‌ ده‌رمانی چاره‌سه‌ری پێنه‌درا بێت بۆ ماوه‌ی سێ هه‌فته ، وەهەر ئاژەڵێك دەرمانی چارەسەركردنی پێدرابێت نابێت ڕاستەوخۆ سەرببڕدرێت بەڵكو پێویستە ماوەی سەربڕین دوای بەكارهێنانی دەرمان بە پێی ڕێنمایی پزیشكی ڤێتێرنەری بێت. ‌

۷.پێویستە لەسەر كەسی قوربانیكەر ( قەصاب و هاووڵاتی) :بە گرتنەبەری گشت ڕێكارەكانی خۆپارێزی و پاك وخاوێنی لەكاتی سەربڕینی ئاژەڵ و گۆشت ئامادەكردن بەتایبەتی بەكارهێنانی دەستكێشی لاستیكی و جلی تایبەتی خۆپارێزی ....هتد. هەروەها شوشتن و تەعقیم كردنی دەست و كەلوپەلەكان دوای بەكارهێنان و دەست دان لە گۆشت و سەربڕینی ئاژەڵ.

٨.ڕێنمایی هاووڵاتیان بكرێت ‌ :

- به‌كارهێنانی كه‌ل و په‌لی خۆپارێزی له‌كاتی مامه‌ڵه‌كردن له‌گه‌ڵ گۆشت و پاشماوه‌ی قوربانی.

_ دووركه‌وتنه‌وه‌ لە كۆبونەوە لەدەروبەری ئاژەڵ لەكاتی سەربڕینی ئاژەڵ و پارچەكردنی گۆشت لە پێناو كەمكردنەوەی بەركەوتن و توش بوون بە نەخۆشی

_ گواستنەوەی گۆشت بەساردكەرەوە یان لەپلەی گەرمی (٢-٦) ئەنجام بدرێت .

_ بەكارهێنانی كیسی (نایلۆن) نوێ و ڕوون و بێ ڕەنگ لەكاتی دابەشكردنی گۆشت.

_ هەڵگرتنی گۆشت بۆماوەی 24 كاتژمێر لەساردكەرەوە، پاشان بەكاربهێنرێت.

_ فڕێنەدانی پاشماوەی سەربڕین لە سەر شەقام و كۆلان وبازارەكان ........هتد.لەبەرئەوە دەبێت گشت پاشماوەكانی سەربڕین لەكیسی نایلۆنی داخراو بكرێت فڕێ بدرێت لە شوێنی تایبەتی دیاریكراو لەلایەن سەربرخانەكان و دەزگا فەرمیەكان.

وەزارەتی کشتوکاڵ و سەرچاوەکانی ئاو

بەرێوەبەرایەتی گشتی سامانی ئاژەڵ و ڤێتێرنەری

بەرێوەبەرایەتی تەندروستی ئاژەڵ