مەسعود بارزانی بەبۆنەی هاتنەوەی جەژنی پیرۆزی قوربانەوە، پەیامێکی پیرۆزبایی ئاراستەی موسڵمانانی کوردستان، عێراق و جیهان کرد.
بارزانی لەم قۆناغە هەستیار و چارەنووسسازەدا، پەیامێکی ڕوونی ئاراستەی سەرجەم لایەن و هێزە سیاسییەکانی کوردستان کرد و داوای لێکردن بەرژەوەندییە باڵاکانی گەل لە سەرووی ئامانجە بەرتەسکەکان دابنێن.
هۆشداریشی دا لە پێویستیی وازهێنان لەو ململانێ بێ ئەنجام و "خۆخۆرییەی" کە ماوەیەکە پرۆسەی سیاسیی هەرێمی پێوە دەناڵێنێت.
لە بەشێکی سەرەکیی پەیامەکەیدا، بارزانی داوای کرد کە ڕاستەوخۆ لە دوای جەژنی قوربان، لایەنە سیاسییەکانی هەرێم بە دڵسۆزی و هەستی نیشتمانپەروەرییەوە پێکەوە کۆببنەوە. ئامانجی ئەم کۆبوونەوەیەش بە چارەسەرکردنی چەقبەستوویی سیاسی و کۆتایهێنان بەم دۆخە نالەبارە ئێستای هەرێم پێناسە کرد.
بارزانی جەختی لەوە کردەوە کە تێپەڕاندنی ئەم دۆخە ئەرکێکی ویژدانی، نەتەوەیی و نیشتمانییە، و پێویستە هەموو لایەک بە هەستی بەرپرسیارێتییەوە مامەڵەی لەگەڵدا بکەن و بگەڕێنەوە سەر ڕێگەی ڕاست.
لە کۆتاییدا هیوای خواست ئەم جەژنە ببێتە دەستپێکێک بۆ باشتربوونی بارودۆخی کوردستان، تێپەڕبوونی گرفتەکان و بەرقەراربوونی ئاشتی لە ناوچەکە و جیهاندا.