بەڕێوەبەرایەتی هاتوچۆی سلێمانی لە نوسراوێکدا سەبارەت بە رەوشی کەشوهەوا داواکارییەک ئاراستەی شۆفێران دەکات.

لە نوسراوەکەدا هاتووە "پاڵپشت بە زانیارییەکانی بەڕێوەبەرایەتی گشتی کەشناسی و بوومەلەرزەزانی - بەشی پێشبینی لە ڕۆژانی هەینی، شەممە، یەکشەممە و دووشەممە گۆڕانکاری و ناجێگیرییەک لە دۆخی کەش و هەوادا دروست دەبێت، شەپۆلەکە سەرتاسەرییە و سەرجەم پارێزگا و ئیدارە سەربەخۆکانی هەرێمی کوردستان دەگرێتەوە وە ئەو کاریگەرییە خۆی لە نمەباران، لەهەندێک شوێن لێزمەباران و هەروەها خۆڵبارین دروست دەبێت و خێرایی با زیاد دەکات".

هاتوچۆ داوا لە شۆفێران دەکات "ئەم گۆڕانکارییانە لە دۆخی کەش و هەوا کاریگەری دەبێت بە ڕەوش و سیستەمی هاتووچۆ و شێوازی شۆفێرێکردن، پێویستە بە ئاگا بن و خێراییەکانیان کەم بکەنەوە و نزیکی ئەو ناوچانە نەبنەوە کە ئەگەری بەرزبوونەوەی ئاو و لافاویان هەیە وەک سەرچاوەی ڕووبارەکان و چەمەکان و هەرشوێنێکی دیکە کە گومانی مەترسی لێدەکرێت، هەروەها پێویستە ڕەچاوی سەرجەم ڕێنماییەکانی هاتووچۆ بکەن بەتایبەت (پاراستنی ماوەی سەلامەتی، کەمکردنەوەی خێرایی، سەرقاڵ نەبوون و بەکارنەهێنانی مۆبایل لەکاتی شۆفێریدا ...)".