هاوپەیمانیی چوارچێوەی هەماهەنگی، لە کۆبوونەوەیەکی گرنگدا کە لە نووسینگەی حەیدەر عەبادی سەرۆکی هاوپەیمانیی نەسر لە شاری بەغدا بەڕێوەچوو، دۆخی ئەمنی و سیاسیی عێراقی تاوتوێ کرد و چەند بڕیارێکی یەکلاکەرەوەی دەرکرد.
لە ڕاگەیەندراوێکی فەرمیدا، هاوپەیمانییەکە پشتیوانیی تەواوی خۆی بۆ عەلی فالح زەیدی، سەرۆکوەزیرانی عێراق دووپاتکردەوە و بە فەرمی سەرپشکی کرد بۆ گرتنەبەری تەواوی ڕێکارەکان بەمەبەستی سنووردارکردن و هێشتنەوەی چەک تەنیا بەدەست دامەزراوەکانی دەوڵەتەوە.
چوارچێوەی هەماهەنگی کە خاوەنی زیاتر لە ١٦٤ کورسیی پەرلەمانە، جەختی لەوە کردەوە کە دەستەی حەشدی شەعبی دامەزراوەیەکی ئەمنیی فەرمییە و پابەندی فەرمانەکانی فەرماندەی گشتیی هێزە چەکدارەکانە، بەڵام پێویستە بە تەواوەتی لە ژێر کاریگەریی سەرجەم هێزە سیاسی، حیزبی و کۆمەڵایەتییەکان داببڕێت و جیا بکرێتەوە.
هاوكات هاوپەیمانییەکە هۆشداریی دا کە بڕیاردان لەسەر هەڵگیرسانی جەنگ یان چەسپاندنی ئاشتی، پرسێکی سەروەریی نیشتمانییە و تەنیا لە دەسەڵاتی گەلی عێراقدایە لە ڕێگەی دامەزراوە دەستوورییەکانی وەک پەرلەمان و حکومەت، و هەر جووڵەیەک لە دەرەوەی ئەم چوارچێوەیە بە دەرچوون لە یاسا دادەنرێت.
لە کۆتاییشدا، سەرۆکوەزیرانی سەرپشک کرد بۆ تەواوکردنی ڕێکارەکانی کۆتاییهێنان بە ئەرکی هاوپەیمانیی نێودەوڵەتیی دژی داعش لە خاکی عێراقدا.