پڕۆسەی گەڕانەوەی حاجییانی هەرێمی کوردستان لە وڵاتی سعوودیەوە بەردەوامیی هەیە، و لەو چوارچێوەیەدا ئەمڕۆ یەکەم کاروانی حاجییانی سنووری پارێزگای سلێمانی گەیشتنەوە خاکی نیشتمان.
کاروان ستوونی، وتەبێژی بەڕێوەبەرایەتیی حەج و عومرەی هەرێمی کوردستان ڕایگەیاند'' یەکەم کاروانی حاجییانی سلێمانی کە لە ٢٩٤ حاجی پێکهاتوون، لە ڕێگەی فڕۆکەخانەی نێودەوڵەتیی سلێمانییەوە گەیشتوونەتەوە.''
ئاشکراشی کرد کە هەر ئەمڕۆ، هەزار و ٢٩ حاجی دیکەی هەرێم لە ڕێگەی وشکانییەوە لە سعوودیەوە دەگەنەوە کەرکووک و ناوچەکانی دیکەی هەرێمی کوردستان.
بەپێی ئەو خشتەیەی کە لەلایەن بەڕێوەبەرایەتیی حەج و عومرەوە ئامادەکراوە، بڕیارە لە ماوەی شەش ڕۆژدا سەرجەم حاجییانی هەرێمی کوردستان بگەڕێنرێنەوە.
پڕۆسەی گەڕانەوەی حاجییان دوێنێ پێنجشەممە بە فەرمی دەستیپێکرد، کە تێیدا هەزار و ٢٧ حاجی لە ڕێگەی حەوت گەشتی ئاسمانییەوە گەڕانەوە و لە کاتی گەیشتنەوەشیاندا لەلایەن وەزیری ئەوقاف و کاروباری ئایینیی حکوومەتی هەرێمی کوردستانەوە پێشوازییان لێکرا.