ناوەرۆکی ئەو رێکەوتنە ئاشکرا دەبێت کە دۆناڵد ترەمپ بەهۆیەوە هێرشە سەربازییەکانی سەر ئێرانی هەڵوەشاندەوە؛ رێککەوتنەکە پرسی کردنەوەی تەنگەى هورمز و دەستپێکردنی دانوستاندنی ئەتۆمی لەخۆدەگرێت.

بە پێی ئاژانسی "مێهر"ی ئێران مەرجەکانی ئێران بەم شێوەیەن:

- پێویستە ئەمریکا سزاکان هەڵگرێت، هێزەکانی لە دەوروبەری ئێران بکشێنێتەوە و لە ماوەی ٣٠ ڕۆژدا کۆتایی بە گەمارۆی دەریایی بهێنێت.

- ئەمریکا و هاوپەیمانەکانی پابەند دەکرێن بە دابینکردنی لایەنی کەم ٣٠٠ ملیار دۆلار بۆ پرۆژەی ئاوەدانکردنەوە و بونیادنانەوەی ئابووریی ئێران.

- مەرجی ئێران بۆ دەستپێکردنی گفتوگۆی ئەتۆمی بریتییە لە: ئازادکردنی ١٢ ملیار دۆلاری سڕکراوی ئێران، کردنەوەی گەرووی هورمز و هەڵگرتنی سزاکانی سەر نەوت.

- گفتوگۆکانی داهاتوو تەنیا تایبەت دەبن بە پرسی ئەتۆمی و ئابووری، و بە هیچ شێوەیەک باس لە پرۆگرامی مووشەکیی ئێران ناکرێت.

میکانیزمی ڕێککەوتنەکە (بەپێی سەرچاوەکانی کەناڵی عەرەبیە):

- ئاگربەستەکە بۆ ماوەی ٦٠ ڕۆژ درێژ دەکرێتەوە و لەو ماوەیەدا گەرووی هورمز دەکرێتەوە.

- لە ماوەی ئەو ٦٠ ڕۆژەدا، دانوستان لەسەر یۆرانیۆمی بەرز پیتێنراو دەکرێت و ئەمریکاش گەمارۆکان سووک دەکات.

- تاران لە ڕێگەی قەتەرەوە ڕەزامەندیی کۆتایی خۆی بە واشنتۆن گەیاندووە و لایەنێکی نێوەندگیر چاودێریی ڕێککەوتنەکە دەکات بۆ ڕێگریکردن لە پێشێلکاری.

پێشبینییەکانی ترەمپ بۆ کۆتایی جەنگ:

- دۆناڵد ترەمپ پێشبینی دەکات سەرەتای هەفتەی داهاتوو ڕێککەوتنی ئاشتی واژۆ بکرێت و هاتوچۆی کەشتییەکان لە گەرووی هورمز ئاسایی ببێتەوە.

-  واژۆکردنی ئەم ڕێککەوتنە دەبێتە گەورەترین دەستکەوتی دیپلۆماسی بۆ کۆتاییهێنان بەو جەنگەی کە ٣ مانگە بەردەوامە، و بووەتە هۆی کوژرانی هەزاران کەس و بەرزبوونەوەی زۆری نرخی وزە لە جیهاندا.