نێردەی تایبەتی دۆناڵد ترەمپ بۆ عێراق و سوریا لە دوو دیداری جیاجیادا لەگەڵ هەریەک لە بافڵ تاڵەبانی و قوباد تاڵەبانی لەبەغدا و لەگەڵ مسرور بارزانی لەهەولێر کۆبووەوە.

نووسینگەی بافڵ تاڵەبانی، سەرۆکی یەکێتیی نیشتمانیی کوردستان رایگەیاند؛ ئێوارەی دوێنێ بافڵ تاڵەبانی دووشەممە لە بەغدا لەگەڵ تۆم باراک، نێردەی تایبەتی دۆناڵد ترەمپ بۆ عێراق و سوریا کۆبووەوە. لە کۆبوونەوەکەدا، بافڵ جەلال تاڵەبانی نیگەرانیی خۆی لەبارەی دواکەوتنی پێکنەهێنانی کابینەی نوێی حکومەتی هەرێمی کوردستان دەربڕی و جەختی کردەوە کە شەرعییەت و متمانەی حکومەتی ئێستا لە مەترسیدایە.

لە کۆبوونەوەکەدا کە قوباد تاڵەبانی، جێگری سەرۆکوەزیرانی هەرێمی کوردستان ئامادەیبوو، دوایین پێشهاتەکانی ناوچەکە تاوتوێ کران. هەردوولا هاوڕابوون لەسەر ئەوەی کە رێککەوتنی نێوان ئەمریکا و ئێران هەنگاوێکی گرنگە بۆ پاراستنی سەقامگیریی ناوچەکە و کەمکردنەوەی گرژییەکان.

هەروەها هاتووە لەپێناو بەدیھێنانی سەقامگیریی سیاسی، ئابووری و ئەمنی، جەخت لەسەر پاڵپشتیکردنی حکومەتی نوێی عێراق کرایەوە. ئامانج لەم پاڵپشتییە، یارمەتیدانی حکومەتی نوێیە بۆ تێپەڕاندنی قەیران و ئاڵنگارییە سیاسی و ئابووری و ئەمنییەکان کە ڕووبەڕووی وڵاتەکە بوونەتەوە.

نوسینەگەکە دەنوسێت؛ بافڵ جەلال تاڵەبانی نیگەرانی خۆی لەبارەی دواکەوتنی پێکنەهێنانی کابینەی نوێی حکومەتی هەرێمی کوردستان دەربڕی. لەمبارەیەوە وتی: "شەرعییەت و متمانەی حکومەتی ئێستا خەریکە دەکەوێتە ژێر پرسیارەوە." ئەمەش ئاماژەیە بۆ نیگەرانییەکانی لەسەر کاریگەریی ئەم دواکەوتنە لەسەر کارایی حکومەت و متمانەی هاووڵاتیان بە دامەزراوە حکومییەکان.

لە کۆبوونەوەکەدا کێشەی وزە خرایەبەر باس و سەرۆکی یەکێتی ئاماژەی بەوە کرد کە هەرێمی کوردستان دەتوانێت بە پلانێکی ستراتیجی کێشەی وزە لە تەواوی عێراق چارەسەر بکات، ئەمەش وەک یەکێک لە بوارە گرنگەکانی هاوکاری نێوان هەرێم و بەغداد خستەڕوو.

لەلایەکی ترەوە نیوەڕۆی ئەمڕۆ سێشەممە، ١٦ی حوزەیرانی ٢٠٢٦، تۆم باراک، نێردەی تایبەتی دۆناڵد ترەمپ، سەرۆکی ویلایەتە یەکگرتووەکانی ئەمریکا بۆ عێراق و سوریا گەیشتە هەولێر و لەگەڵ مەسرور بارزانی، سەرۆکی حکومەتی هەرێمی کوردستان کۆبووەوەو چەندان پرسی گرنگی ئەمنی و سیاسی تاوتوێ کرا.

بڕیارە هەر ئەمڕۆ باراک لەگەڵ مەسعود بارزانی، سەرۆکی پارتی دیموکراتی کوردستان و نێچیرڤان بارزانی، سەرۆکی هەرێمی کوردستان کۆببێتەوە.

ئەمە لە کاتێکدایە، دوێنێ دووشەممە، ١٥ی حوزەیران، باراک گەیشتە بەغدا و لەگەڵ عەلی فالح زەیدی، سەرۆکوەزیرانی عێراق کۆبووەوە.

ئەمە یەکەمین سەردانی باراکە بۆ هەولێر و بەغدا وەک نێردەی فەرمیی سەرۆکی ئەمریکا بۆ عێراق و سوریا.