لە شاری سلێمانی گۆڕانکاری لە دوو پۆستی باڵای ئەمنیدا کرا
و بەڕێوەبەری نوێی پۆلیس و بەڕێوەبەری ڕەگەزنامە و باری شارستانیی پارێزگاکە دەستبەکاربوون.
ئەمڕۆ ٦ی تەموزی ٢٠٢٦، ڕێوڕەسمی دەستبەکاربوونی عەمید هێمن
کەمال نوری وەک بەڕێوەبەری نوێی پۆلیسی سلێمانی بەڕێوەچوو. عەمید هێمن لەبری عەمید
ئارام محەممەد دەستبەکاربوو کە بەهۆی تەمەنەوە خانەنشین بووە. عەمید هێمن کەمال
نوری وەک گەنجترین بەڕێوەبەری پۆلیس لەسەر ئاستی هەرێمی کوردستان دادەنرێت کە تاوەکو
ئێستا ئەو پۆستەی وەرگرتبێت.
لە هەمان ڕێوڕەسمدا، عەمید زوڵفان غەریب وەک بەڕێوەبەری نوێی
ڕەگەزنامە و باری شارستانیی سلێمانی دەستبەکاربوو. پرۆسەی دەستاودەستکردنی پۆستەکان
بە ئامادەبوونی عەتا محەممەد، بەڕێوەبەری نووسینگەی قوباد تاڵەبانی، جێگری سەرۆکوەزیرانی
هەرێمی کوردستان ئەنجامدرا.
ڕێوڕەسمەکە بۆ گۆڕانکاری لە پۆستە ئەمنییەکانی پارێزگای سلێمانی
بەڕێوەچوو، کە تێیدا جەخت لە بەردەوامیی کارە کارگێڕی و ئەمنییەکان کرایەوە. گۆڕانکارییەکان
لە چوارچێوەی ڕێکخستنەوەی پۆستەکان و خانەنشینبوونی بەشێک لە ئەفسەرە باڵاکاندایە
کە تەمەنی یاساییان تەواو کردووە.