ئەنجومەنی باڵای دادوەریی عێراق، ئەمڕۆ پێنجشەممە، رایگەیاند کە لە بەردەوامیی لێکۆڵینەوەکان لە دۆسیەی "عەدنان جومەیلی"، بریکاری دەستگیرکراوی وەزارەتی نەوت بۆ کاروباری پاڵاوگەکان، بڕی ١٤ ملیار دیناری دیکە دۆزرایەوە و دەستی بەسەردا گیرا.

بەپێی ڕاگەیەندراوی ئەنجوومەنەکە، ئەم پارەیە کە لە شوێنێکی چاوەڕواننەکراودا و لەناو چاڵێکی ئاوەڕۆدا شاردرابووەوە، بەشێکە لەو بڕە پارەیەی کە لە پڕۆژەیەکدا بەهەدەر دراوە و تۆمەتباران بۆ بەرژەوەندیی خۆیان گلیان دابووەوە.

بەمەش کۆی ئەو پارانەی تا ئێستا لەم دۆسیەیەدا گەڕێندراونەتەوە، گەیشتە ١٤١ ملیار دینار و ٢٤ ملیۆن دۆلار.

ئەمە لەکاتێکدایە کە بەرپرسانی عێراق ئاماژە بەوە دەکەن قەبارەی گەندەڵییەکان تەنیا لەم دۆسیەیەدا دەگاتە نزیکەی ٥٠٠ ملیار دینار و لێکۆڵینەوەکانیش بۆ دۆزینەوەی تەواوی پارەکان بەردەوامن.