بە پێی لیدوانی سەرپەرشتیاری ئیدارەی سەربەخۆی سۆران، لە سنووری قەزای سیدەکان شوانێک بە تەقەی سوپای پاسدارانی ئێران گیانی لەدەستدا و ئێستاش تەرمەکەی و مەڕو ماڵاتەکەی لای هێزە ئێرانییەکانە و نایدەنەوە.

هەڵگورد شێخ نەجیب، سەرپەرشتیاری ئیدارەی سەربەخۆی سۆران راگەیاند: "شوانێکی سنووری قەزای سیدەکان لەلایەن سوپای پاسدارانەوە کوژراوە؛ ئەو گەنجە ناوی (رێباز سلێمان هەرکی)یە و لەو سنوورە خەریکی شوانی و بەخێوکردنی مەڕو ماڵات بووە."

سەبارەت بە رووداوەکە، هەڵگورد شێخ نەجیب وتی: "مەڕو ماڵاتەکەی چووبوونە نێو سنووری ئێران و دەیویست بیانهێنێتەوە، بەڵام سوپای پاسداران تەقەیان لێکردووە و گیانی لەدەستداوە."

وتیشی، ئێستا تەرمی ئەو شوانە لای هێزە ئێرانییەکانە و رادەستیان نەکردووەتەوە، هەروەها دەستیشیان بەسەر هەموو مەڕو ماڵاتەکەیدا گرتووە.