دادگای لێکۆڵینەوەی نەینەوا، تایبەت بە کەیسەکانی دەستپاکی، بڕیاری بەپەلەی دەستبەسەرداگرتنی بۆ زنجیرەیەک موڵک و ماڵی گرانبەها دەرکرد کە پەیوەندییان بە دۆسیەی گەندەڵی و سپیکردنەوەی پارەی عەدنان جومەیلی، بریکاری وەزارەتی نەوتی عێراقەوە هەیە، کە کۆی گشتی بەهاکەیان دەگاتە نزیکەی ٦٩ ملیار دیناری عێراقی.

ئەم ڕێکارە یاساییە لە چوارچێوەی هەوڵەکانی دادگا دێت بۆ شوێنپێهەڵگرتنی سەروەت و سامانە گوماناوییەکان و وشککردنی سەرچاوەکانی دەوڵەمەندبوونی نایاسایی و پاراستنی ماڵی گشتی، لە کاتێکدا ڕاوەدوونانی تۆمەتبارە هەڵاتووەکانی ناو کەیسەکە تا یەکلاکردنەوەی کۆتایی دۆسیەکە بەردەوام دەبێت.

ئەو سامانە زەبەلاحەی کە لەلایەن دادگاوە دەستی بەسەردا گیراوە، پێکهاتووە لە ٩ موڵکی بازرگانی لە شاری مووسڵ کە بەهاکەیان لە بازاڕدا بە ٤٥ ملیار دینار دەخەمڵێندرێت، لەگەڵ ٣ کارگەی گەورەی بەرهەمهێنانی ئارد بە بەهای ٢٤ ملیار دینار، جگە لە دەستبەسەرداگرتنی ٧ بارهەڵگری نوێ کە بەهای هەر یەکێکیان دەگاتە ٢٠٠ هەزار دۆلاری ئەمریکی.

دادگای نەینەوا ئاشکرای کردووە کە تۆمەتبارە هەڵاتووەکانی ناو ئەم دۆسیەیە، بۆ چەواشەکاری و شاردنەوەی سەرچاوە نایاساییەکەی، سەرجەم ئەم موڵک، بارهەڵگر و کارگانەیان بە ناوی کرێکارەکانی خۆیانەوە تۆمار کردووە تاوەکو لە چاوی یاسا و لایەنە چاودێرییەکان لای بدەن.

لەبەر ئەوەی ئەم خانووبەرە، بارهەڵگر و کارگانە پڕۆژەی بەرهەمهێنەری زیندوون و داهاتی بەردەوامیان هەیە، دادگای لێکۆڵینەوەی نەینەوا بڕیاریدا بە دامەزراندنی پاسەوانی دادوەری بۆ بەڕێوەبردن و پاراستنی پڕۆژەکان، تاوەکو بەردەوامی بە کارەکانیان بدرێت و چەرخی بەرهەمهێنانیان نەوەستێت، هاوکات لەم ڕێگەیەوە سەرجەم داهاتە داراییە بەردەوامەکانیشیان بۆ خەزێنەی دەوڵەت مسۆگەر بکرێت.