کۆمەڵەی شۆڕشگێڕی زەحمەتکێشانی کوردستانی ئێران لە راگەیەنراوێکدا گیان لەدەستدانی یەکێک لە بریندارەکانی موشەکبارانی ١٧ی تەموزی بارەگاکانیانی راگەیاند.

لە راگەیەنراوەکەی سکرتاریەتی کومیتەی ناوەندی کۆمەڵەی شۆڕشگێڕی زەحمەتکێشانی کوردستانی ئێراندا هاتووە: "خەڵکی تێکۆشەری کوردستان ئاگادار دەکەینەوە کە بەداخەوە ئەمڕۆ ڕێکەوتی ٣٠ی پوشپەری ١٤٠٥ی هەتاوی، هاوڕێ ئەبووبەکر هوشەنگی یەکێک لە بریندارەکانی هێرشی ڕۆژی هەینی بۆ سەر بارەگاکانی کۆمەڵە لە زرگوێز و دەوروبەری بە هۆی سەختی برینەکەیەوە گیانی ئازیزی بەختکرد".

هەروەها هاتووە: "کۆمەڵە وێڕای سەرخۆشی لە بنەماڵە و کەس و کاری، هاوڕێ و هاوسەنگەرانی، سەرجەم خەڵکی کوردستان و بە تایبەت خەڵکی مەریوان، پێداگری لەوە دەکاتەوە کە ڕێگە و ڕێبازی هاوڕێ ئەبووبەکر ون نابێ و خوێنی گەشی هاوڕێیانی گیانبەختکردوومان هەوێنی درێژەدانی خەبات و شۆڕشمان دەبێت."

رۆژی ١٧ی تەموزی ٢٠٢٦، بارەگاکانی کۆمەڵە لە ناوچەی زڕگوێزەڵە بەچەندین موشەکی ئێران کرانە ئامانج کە بە هۆیەوە ٩ پێشمەرگە گیانیان لەدەستدا و سێ پێشمەرگەش بریندار بوون.