ئەو بەرپرسەی وەزارەتی ئەوقاف کە هاوکات کادیری پێشکەوتووی پارتییە لە وتارێکیدا بەناوی تاوانەکانی فاروق رەفیق باس لەوە دەکات تاوانی فاروق رەفیق تەنها ئەوەیە ڕا و بۆچونی خۆی دەربڕیوە لەسەر رۆڵی ئیسلامیەكانی كوردستان و كاریگەریان لەسەر كۆمەڵگەی كوردەواری و (حیجاب)ی ئافرەتانی بەجلوبەرگێكی سیاسی و نامۆ بەكلتوری كوردەواری وەسفكردوە.

ئەو هەموو جنێو و هەڕەشەیەی لەمیدیا ئیسلامیەكان و تۆڕە كۆمەڵایەتیەكان دەكرێتە سەر (د.فاروق رەفیق) لەسەر ئەوە نیە كە هانی گەنجەكانی كوردستانی دابێت تا بڕۆنە ناو داعش و گروپە تیرۆرستیەكان، "لەسەر سوكایەتیش بەپێشمەرگە قارەمانەكان و كەمایەتیە ئاینەكانی كوردستان نیە و لەسەر بەهەدەردان و دزینی سەروەت و سامانی كوردستان نیە و (ئۆتۆمبیلی درع) یشی نیە و كەناڵی ئاسمانی نیە تا لێی بپرسن خەرجیەكانت لەكوێ هێناوە، "سرودی (ئەی رەقیب)ـیشی بەحەرام نەزانیوە و لەسەر هاوسۆزی و جاسوسی و پاشكۆیەتی بۆ ئیخوانەكانی میسر و توركیا و بۆ سەلەفیەكانی سعودیە و شیعەكانی ئێران "نەكردوە".

 

پەرلەمانتاری بێ ئیش و موچە زەبەلاحیش نەبوە و خانشینی نایاسایی و بندیوار نیە، "بەشداری لەئەنفالی خەڵكی كوردستان نەكردوە و كەسیشی نەكوشتوە و رۆژێك لەرۆژان ئەندام و چەكداری هێز و گروپە توندڕەوەكان نەبوە.

 

"فاروق رەفیق هۆكاری تەنگژەی دارایی و ئابوری و سیاسی و خراپی ئەدای پەرلەمان و حكومەتی هەرێم نیە".

 

تاوانی فاروق رەفیق تەنها ئەوەیە ڕا و بۆچونی خۆی دەربڕیوە لەسەر رۆڵی ئیسلامیەكانی كوردستان و كاریگەریان لەسەر كۆمەڵگەی كوردەواری و (حیجاب)ی ئافرەتانی بەجلوبەرگێكی سیاسی و نامۆ بەكلتوری كوردەواری وەسفكردوە.

 

"فاروق رەفیق سەرۆكایەتی پەرلەمانی كوردستانی بەباكگراوندی ئیسلامی وەسفكرد كە ئەمە سادەترین مافی ڕادەربڕینە".

 

باشە ئەو ئیسلامیانەی ئێستا ئەم هەموو جنێوە دەدەن و بەم شێوەیە هێرش و هەڕەشە دەكەنە سەر كەسێك كە ڕۆژێك لەڕۆژان لەگەڵ سەركردە و ئەندام و لایەنگرانی حزبەكانی خۆیان بەشداری خۆپیشاندان و ناڕەزاییەكانی 17ی شوباتی كردوە، "ئەگەر بگەنە دەسەڵات و حكومڕانی خەڵكی ئەم وڵاتەیان بكەوێتە دەست چ كارەساتێك بەسەر خەڵكی ئازادیخوازی ئەم كوردستانە دێنن؟!