ئەندامێكی سەركردایەتی پارتی جەخت لەسەر ئەوە دەكاتەوە كە حیزبەكەی داوای لە گۆڕان كردووە، د.یوسف محەمەد دەست لە كار بكێشێتەوە.

ئەو ئەندامەی سەركردایەتی پارتی كە ناوی بڵاونەكراوەتەوە بە رووداوی وتووە: "یوسف محەممەد، دەبێ دەست لەكاركێشانەوەكەی بنووسێ و بگەڕێتەوە بۆ پەرلەمان و كۆبوونەوەیەكی پەرلەمان بكرێ‌ و تێیدا دەست لەكاركێشانەوەكەی خۆی رابگەیەیەنێت".

ئەندامەكەی سەركردایەتی پارتی دەڵێت "پارتی بۆ چارەسەركردنی دۆخی سیاسی و مەسەلەی پۆستی سەرۆكی پەرلەمانی كوردستان، سێ بژارەیان خستووەتە بەردەم بزووتنەوەی گۆڕان: یەكەم، دەستبەرداری پۆستی سەرۆكی پەرلەمان بن و دەستەیەكی نوێ بەبێ گۆڕان پێكدێ كە لە پارتی و یەكێتی و یەكگرتووی ئیسلامی دەبێ، بەڵام پارتی لەگەڵ مانەوەی گۆڕان لە حكومەتدا كێشەی نییە".

 سەبارەت بە بژارەی دووەمیش وتی: "ئەگەر گۆڕان بژارەی یەكەم قبووڵ نەكات، دەبێ ببێتە ئۆپۆزیسیۆن، ئەگەر ئەویش قبووڵ نەكات ئەوا بژارەی سێیەممان هەیە، ئیدی بەرەو هەڵبژاردنی پێشوەختە دەڕۆین و لە ماوەی شەش مانگدا هەڵبژاردن دەكەین".

هەروەها دەڵێت: "ئاماژەكان و ئەو كۆبوونەوانەی لەو ماوەیەدا كراون، پێدەچێ پارتی و یەكێتی و یەكگرتوو، تەنانەت كۆمەڵی ئیسلامیش نەخشەیەكی نوێی سیاسی دابڕێژن".