پەرلەمانتارێكی پارتی رایدەگەیەنێت كە بەغدا بەنیازە كۆمەكی پەكەكە بكات‌و لەناوچەی كەركوك‌و خانەقین حەشدی كوردی دروست بكات‌و دژی هەرێم بەكاری بێنێت.

شاخەوان عەبدوڵا، پەرلەمانتاری پارتی لە پەرلەمانی عێراق بەمیدیاكانی حیزبەكەی راگەیاند: بەغدا كۆمەكی پەكەكە دەكات و بەنیازی دروستكردنی حەشدی كوردیشە لە كەركووك و خانەقین، تا پەیامێك بە هەرێمی كوردستان بگەیەنێت و بڵی تا ئێستە خۆم بە خاوەنی هەرێم دەزانم و هێز بۆ خۆی دروست بكات كە ویست و ئامانجی بەغدا لە هەرێم و ناوچەكە بپێكین.

هەروەها وتی،  ئێستە حزبە كوردستانییەكان پرسی ئاڵا و خۆبەستنەوە بە عێراق و چوونە ژێر باری عێراق، بووەتە هێڵێكی سوور و حزبە نیشتمانییەكان ناچنە ئەو چوارچێوەیە و ئەوەشی بچێت رووبەڕووی جەماوەری كوردستان دەبێتەوە، بۆیە بەغدا دەیەوێ لە دەرەوەی حزبە كوردستانییەكان هێز و خەڵكانێك بدۆزێتەوە كە ویست و ئامانجی ئەوان بێننە دی. ئەمەیش لە رێگەی پارەوە بۆ دروستكردنی حەشدی كوردی و دواتریش كۆمەككردنی پەكەكە لە بادینان.