ئەندامێكی مەكتەبی سیاسی پارتی ئاشكرایدەكات، حیزبەكەی هەندێك لەناوچەكان‌و لقەكانی خۆی كەمدەكاتەوە‌و گۆڕانكاریی لە بەرپرسەكانیشدا دەكات.

عارف تەیفور، ئەندامی مەكتەبی سیاسی پارتی دیموكراتی كوردستان بە ماڵپەڕی فەرمیی پارتەكەی وت: "لە دواكۆبوونەوەی پارتی دیموكراتی كوردستاندا، بڕیاری درا كە كۆمەڵێك لیژنە دروست بكرێن بۆ چاكسازیی ناوخۆیی پارتی، بۆ ئەوەی چەند بارەگایەك دابخرێن كە زیادن و لقەكانیش كۆ بكرێنەوە و، هەندێك لە ناوچەكان و هەندێك لە لقەكان كەم بكرێنەوە و یەك بگرنەوە، هەروەها لیژنەیەكی دیكە دروست كرا كە چاكسازیی گشتی بكرێت و پڕۆژەیەك ئامادە بكات و مەكتەبی سیاسییش لەسەر ئەو بنەمایە كاری خۆی بكات".
 وتیشی، لیژنەكان گۆڕانكاری لە بەرپرسەكانیشدا دەكەن، لەوانە بەرپرسی لقەكان و گوتەبێژی فەرمیی پارتی و بەرپرسی دەزگای هەڵبژاردن و مەكتەبی رێكخستنی پارتی.
 
ئه‌و ئەندامه‌ی مەكتەبی سیاسیی پارتی ده‌شڵێت، دیار نییە كە گۆڕانكاری لە بەرپرسی لقەكاندا بە چ شێوەیەك دەبێت، كە ئایا جێگۆڕكێ دەبێت یاخود كەسانی دیكە لە شوێنیان دادەنرێت، ئەمەیش لیژنە بڕیاری لەسەر دەدات.