كادیرێكی پێشكەوتوی یەكێتی سەردانی نەوشیروان مستەفا رێكخەری گشتی گۆڕان دەكات كە چەند مانگێكە هەرێمی كوردستانی بەجێ هێشتوەو لە وڵاتی بەریتانیایە .

سلێمان عەبدوڵا یونس، ئەندامی مەكتەبی رێكخستنی یەكێتی و كادیری پێشكەوتووی ئەو حزبە وێنەیەكی خۆی و خێزانەكەی و نەوشیروان مستەفای بڵاوكردۆتەوەو ئاشكرای دەكات كە رۆژی 1/11/2016 لەگەڵ شیرینی خێزانی سەردانی نەوشیروان مستەفایان كردووە لە لەندەن .

لەوەڵای چەند پرسیارێكیش لەبارەی ئەوەی ئایە نەوشیروان مستەفا بۆچی سەردانی هەولێر ناكات و دەست پێشخەر نابێت ، كادیرەكەی یەكێتی دەڵێت: "ئێمە بۆچوونی خۆمان پێش ئەم سەردانەش نوسیوە هیوام وایە دوای سەرکەوتن و کۆتایی جەنگی داعش بتوانین کێشەکانی نێوان حزبەکان و گوزەرانی خەڵک چارە بکەین .

لەبارەی گەڕانەوەی نەوشیروان مستەفاش تەنیا دەڵێت: لەماوەیەكی نزیكدا دەگەڕێتەوە .

لەبارەی هۆكاری سەردانەكەشی بۆ لای نەوشیروان مستەفا كادیرە پێشكەوتوەكەی یەكێتی ئاماژەی بەوە كردووە كە سەردانێکی کۆمەڵایەتی بوەو بۆ گوێ گرتن لەبۆچوونەکانی و گەیاندنی سەرنجەکانی خۆی بووە .

لەوەڵامی پرسیاری ئەوەی كە "سلێمان عەبدوڵا بەردەوام قسەی بە گۆڕان و نەوشیروان مستەفا وتوەو چۆن ڕووی ئەوەی هەبووە سەردانی بكات" ، ناوبراو لە وەڵامدا نوسیویەتی: من ڕەخنەی سیاسیم هەبووە نەک شەخسی و هەرواش دەمێنمەوە .