مامۆستایانی هاوبەش ڕاگەیەندراوێکیان بڵاوکردەوە و ڕایانگەیاند به‌فشار و تووندوتیژی‌ ده‌رگاكان ناكرێنه‌وه‌ و تاكه‌ كلیلی‌ چاره‌سه‌ر باشتركردنی‌ ژیان و گوزه‌رانی‌ مامۆستایانه‌.

لە ڕاگەیەندراوەکەی مامۆستایانی هاوبەشدا، کە لە مامۆستایانی سەردەم و یەکگرتوو، و پێشەنگ و سەربەخۆکان پێکهاتووە، هاتووە "وه‌ك هه‌موو لایه‌ك ئاگاداره‌ زیاتر له‌ دوو مانگه‌ مامۆستایان له‌ سنووری‌ پارێزگاكانی‌ سلێمانی‌ و هه‌ڵه‌بجه‌ و ئیداره‌كانی‌ گه‌رمیان و راپه‌ڕین و قه‌زای‌ كۆیه‌ بۆ داواكردنی‌ مافه‌ سه‌ره‌تاییه‌كانیان بایكۆتی‌ هۆڵه‌كانی‌ خوێندنیان كردووه‌ و به‌شێوه‌یه‌كی‌ زۆر شارستانیانه‌ خۆپیشاندان و گردبوونه‌وه‌كانیان ئه‌نجام ده‌ده‌ن".

هەروەها ڕاشیانگەیاندووە "به‌داخه‌وه‌ له‌م دواییانه‌دا فشاره‌كان بۆ سه‌ر مامۆستایان و رێكخه‌ری‌ خۆپیشاندانه‌كان چڕكراوه‌ته‌وه‌ و له‌ سووتاندنی‌ سه‌یاره‌ و هه‌ڵكوتانه‌سه‌ر ماڵی‌ مامۆستایان و ده‌ستگیركردنیان به‌شێوه‌یه‌كی‌ نایاسایی و دوور له‌ هه‌موو به‌هایه‌كی‌ مرۆڤایه‌تی‌".

ئەمەش لە کاتێکدا مامۆستایانی ناڕازی جەختیان لەوەکردووەتەوە کە بەردەوام دەبن لە بایکۆت و سبەینێ دەست بە دەوام ناکەنەوە.