وەزارەتی ئەوقافی هەرێم ناڕەزایی دەردەبڕێت لەسازكردنی كۆنگرەیەك لە شاری سلێمانی كە نوێنەری رابەری كۆماری ئیسلامی ئێران تیایدا بەشداربووە، ئەوەش بەدەستوەردانی ئەو وڵاتە دادەنێت لەكاروباری هەرێمدا.

ئەمڕۆ پێنجشەممە وەزارەتی ئەوقاف و كاروباری ئایینی هەرێمی كوردستان بەیاننامەیەكی ناڕەزایی سەبارەت بەو كۆنفرانسەی بەناوی (شافعی) لە شاری سلێمانی ئەنجامدرا بڵاوكردەوە و بەدەستوەردانی كۆماری ئیسلامی ئێرانی دادەنێت لەكاروباری ناوخۆی هەرێمی كوردستاندا.

لە بەیاننامەكەدا هاتووە "لەكاتێكدا بارودۆخی ناوچەكە بەحاڵەتێكی هەستیارو پڕ لەكێشەی مەزهەبی‌و ئاینیدا تێپەڕدەبێت ‌و لەوكاتەی تەنها چەند سەعاتێك بەسەر كردەوەیەكی تیرۆریستی لەشاری كۆیە تێپەڕبوە، رۆژی چوارشەممە 21/12/2016 لە شاری سلێمانی كۆنفرانسێكی ئایینی بەناوی (شافعی) بەبێ ئاگاداری وەزارەتی ئەوقاف ‌و بەبەشداری نوێنەری رابەری كۆماری ئیسلامی ئێران و چەند بەرپرسێكی ئەو وڵاتە ئەنجام دەدرێت".

 ئاماژەشی داوە بەوەی، جگەلەوەی ئەو كارە دەستوەردانێكی خراپە لەكاروباری ئاینی، لەهەمان كاتیشدا ئیستیفزازكردنی وەزارەتی ئەوقافی حكومەتی هەرێم و مامۆستایانی ئاینی و خەڵكی كوردستانیشە بەگشتی. بۆیە ناڕەزایی توند بەرامبەر بەهەموو ئەو كەس ‌و لایەن ‌و ئەم دەستوەردانەی كۆماری ئیسلامی ئێران لەكاروباری ئاینی هەرێمی كوردستان دەردەبڕین.