ئەمڕۆ ١٩ی ئایار نەوشیروان مستەفا ڕێکخەری گشتی بزووتنەوەی گۆڕان کۆچیی دوایکرد، بەر لە ٢٥ ساڵیش و لە ١٩ی ئایاردا یەکەم هەڵبژاردن بۆ پەرلەمانی کوردستان ئەنجامدرا.

ئەمڕۆ نەوشیروان مستەفا لە ڕۆژی هەینیدا کۆچی دوایکرد، بەر لە سێ مانگ و دوو ڕۆژ ، هاوسەرەکەشی (شوعلە عەلی) هاوشێوەی نەوشیروان مستەفا لە ڕۆژی هەینیدا کۆچیی دوایی کرد.

نەوشیروان مستەفا ڕێکخەری گشتی بزووتنەوەی گۆڕان لە ساڵی ١٩٩٤ لە شاری سلێمانی لەدایکبووە، دوای ٧٣ ساڵ و لە هەمان شاردا کۆچیی دوایکرد، هاوکات لە ڕۆژی یەکەم هەڵبژاردنی پەرلەمانی کوردستاندا لە ساڵی ١٩٩٢ کۆچی دوایی کرد.

نەوشیروان مستەفا لە ساڵی ١٩٤٤ لە گەڕەکی سەرشەقامی شاری سلێمانی لەدایکبووە و لە ساڵی ١٩٦٧ کۆلێژی زانستە سیاسییەکانی زانکۆی بەغدای تەواو کردووە.

لە ساڵی ١٩٦٧ دا نەوشیروان مستەفا بووە بە ئەندامی لقی سلێمانی پارتی دیموکراتی کوردستان و یەکێکە لە دامەزرێنەرانی یەکێتی نیشتیمانی کوردستان لە ساڵی ١٩٧٥ دا و تا ساڵی ٢٠٠٦ لە ناو یەکێتیدا کاری کردووە و جێگری سکرتێری گشتی یەکێتی بووە.

لە ٢٥ تەمووزی ٢٠٠٩ دا بزووتنەوەی گۆڕانی دامەزراند و لیستەکەی ٢٥ کورسی خولی سێیەمی پەرلەمانی بەدەستهێنا و لە خولی چوارەمیشدا گۆڕان ٢٤ کورسی پەرلەمانی بەدەستهێنا.

نەوشیروان مستەفا لە ساڵی ١٩٨١ هاوسەرگیری کردووە و دوو کوڕ و کچێکی هەیە بە ناوەکانی نما و چیا و چرا و چەندین کتێبی لە بواری مێژوویی و ڕۆژنامەگەریدا نوسیوە و زنجیرە کتێبێکیشی هەیە کە تایبەتە بە ژیانی سیاسی خۆی و ئەو ڕووداوانەی لە کاتی ئەنجامدانی کاری سیاسیدا ڕوویانداوە