چرا ئەمڕۆ لە پرسەی باوکیدا لە پرسەی ژناندا دەرکەوت و بەخێرهاتنی میوانەکانی کرد و ئەمەش بە یەکەم ڤیدیۆیی کچەکەی نەوشیروان مستەفا ڕێکخەری گشتی بزووتنەوەی گۆڕان دادەنرێت.

چرا نەوشیروان مستەفا، یەکێکە لەو کچی سەرکردانەی کە تا ئێستا کەمترین دەرکەوتنی لە کاری سیاسی هەبووە و زۆر کەم لە میدیاکان دەرکەوتووە یەکەمین دەرکەوتنیشی لە بەریتانیا بوو لەگەڵ باوک و چیا و نما.

ئەو کچەی نەوشیروان مستەفا دوو مانگ لەمەوپێش دایکی لەدەستدا و ئەمڕۆش لە پرسەی باوکیدا بە هەمان شێوەی براکانی دەرکەوت.

نەوشیروان مستەفا لە ساڵی ١٩٤٤ لە گەڕەکی سەرشەقامی شاری سلێمانی لەدایکبووە و لە ساڵی ١٩٦٧ کۆلێژی زانستە سیاسییەکانی زانکۆی بەغدای تەواو کردووە.

لە ساڵی ١٩٦٧ دا نەوشیروان مستەفا بووە بە ئەندامی لقی سلێمانی پارتی دیموکراتی کوردستان و یەکێکە لە دامەزرێنەرانی یەکێتی نیشتیمانی کوردستان لە ساڵی ١٩٧٥ دا و تا ساڵی ٢٠٠٦ لە ناو یەکێتیدا کاری کردووە و جێگری سکرتێری گشتی یەکێتی بووە.

لە ٢٥ تەمووزی ٢٠٠٩ دا بزووتنەوەی گۆڕانی دامەزراند و لیستەکەی ٢٥ کورسی خولی سێیەمی پەرلەمانی بەدەستهێنا و لە خولی چوارەمیشدا گۆڕان ٢٤ کورسی پەرلەمانی بەدەستهێنا.

نەوشیروان مستەفا لە ساڵی ١٩٨١ هاوسەرگیری کردووە و دوو کوڕ و کچێکی هەیە بە ناوەکانی نما و چیا و چرا و چەندین کتێبی لە بواری مێژوویی و ڕۆژنامەگەریدا نوسیوە و زنجیرە کتێبێکیشی هەیە کە تایبەتە بە ژیانی سیاسی خۆی و ئەو ڕووداوانەی لە کاتی ئەنجامدانی کاری سیاسیدا ڕوویانداوە.