سلێمان عەبدوڵا یونس، کادیری پێشکەوتووی یەکێتی و نزیک لە بەرهەم ساڵح بۆچوونی ئەو سەرکردەیەی یەکێتی لەبارەی جوڵانەوەی نەخێر لە ئێستادا و ڕیفراندۆم دەخاتە ڕوو.

سلێمان عەبدوڵا یونس ئەندامی مەكتەبی رێكخستنی یەكێتی نیشتمانی كوردستان و كادری پێشكەوتوی ئەو حزبە كە بەكەسێكی نزیك لە بەرهەم ساڵح هەژمار دەكرێت و سەرۆکی دەزگای خەندانە کە لەلایەن بەرهەم ساڵحەوە پاڵپشتی دارایی دەکرێت ڕایگەیاند بڕوایان وایە ئەمڕۆ ریفراندۆم بێت یان هەفتەی داهاتوو، یان 25ی ئەیلول یان پێش مانگێك و ساڵێك پاش ئەوە گرفتەكە نییە، بەڵكو گرفتەكە ئەوەیە ئایا ئێمە كۆدەنگییەكی كوردستانیمان هەیە بۆ ئەم مەبەست و ئامانجە، هەركات ئەوەمان هەبوو نە درەنگ و نە زووە، هیچ رۆژێك پیرۆز نییە و ئەو رۆژەی دانراوە قابیلی گۆڕان بێت دەبێت و قابیلی پاشخستن و پێشخستن بێت، ئەو رۆژە پێویستە پەیوەست بێت بە یەكڕیزی و یەكدەنگی هێز و لایەنە سیاسییەكانەوە، چونكە ئەوە بەرژەوەندییەكی كوردستانییە و بڕیارێكی كوردستانییە و ریفراندۆم و سەربەخۆیی خەون و ماف و خواستی خەڵكە و هیچ هێزێكی سیاسی دژی ئەم خواست و خەونە نییە و هەموو هێزەكانیان خەباتیان لەو پێناوەدا بووە.

سڵێمان عەبدوڵا یونس وتوشیەتی "ئێمە دژی دابەشكارین، لەگەڵ ئەوەین كە ئەگەر جیاوازیەك هەبوو لەسەر رۆژەكە ئەو جیاوازییە نەبێتە دروستكردنی بەرەیەكی جیاواز و بەسەر دوو بەرەدا دابەشمان نەكەن، یەكێتی نیشتمانی كوردستان نوێنەری لە كۆمیتەی ریفراندۆم هەیە، بەڵام بەبڕوای من پێویستە یەكێتی پێداگری بكات لەسەر نوێنەری گۆڕان و كۆمەڵیش كە لە كۆمیتەكەدا هەبن و بەشداریبكەن، چونكە ئەگەر نوێنەری ئەو دوو لایەنە ئەندامی لیژنەی ریفراندۆم نەبن، ئەوكات یەكێتی و بنكە جەماوەرییەكەی ناتوانن تەفەهومی ئەوە بكەن و لە هەڵبژاردنەكانی داهاتووش یەكێتی باجێكی گەورە دەدات، بۆ ئەوەی ئەمە روونەدات پێویستە پارتی دیموكراتی كوردستان رەچاوی دۆخی یەكێتی بكات و یەكێتیش دەبێت رەچاوی دۆخی خانەی راپەڕاندن و سەركردایەتی گۆڕان بكات كە هێشتا لە دۆخێكی دژواردایە.

سەبارەت بە هەڵوێستی بەرهەم ساڵح لەبارەی پرسی ریفراندۆم و كاردانەوەكانەوە ناوبراو وتویەتی "دكتۆر بەرهەم لەگەڵ كۆدەنگی و رێككەوتنی هێزەكانە، لەگەڵ ئەوەیە هیچ رۆژێك موقەدەس نییەو هیچ رۆژێكیش بێزراو نییە، هیچ كات درەنگ نییە و هیچ كات زوو نییە، ئەو دەڵێت هەر ئەمڕۆ پەرلەمان كارا بكەینەوە و یەكێتی نێوان هێزە سیاسیەكان دەستەبەر بكەین، گۆڕان و پارتی بگەنە قۆناغێكی تازە، بەهەموومان لەپەرلەمانی كوردستان كێشەكانی سەرۆكایەتی هەرێم چارەسەر بكەین، دوای ئەوە بەوەفدێكی كوردستانی یەك و یەكگرتوو كە لە پەرلەمانەوە بڕیاری لەسەر دەدرێت بڕۆین لە بەغدا دانوستاندن بكەین بەرهەم صاڵح پێیوایە ئەم بابەتە دابڕاو نییەو قەتیس نییە لەنێوان بەڵێ‌ و نەخێردا، بەڵكو پێویستی بە یەكڕیزی و كۆمەڵێك پێداویستی ترە.

لەبارەی ئەوەی کە دەوترێت بەرهەم ساڵح پشتگیری جوڵانەوەی نەخێر دەکرێت کە لەلایەن شاسوار عەبدولواحیدەوە ڕاگەیەندراوە، سلێمان ڕەتی دەکاتەوە و دەڵێت " بەموتڵەقی ئێمە هاوسۆزییەكمان لەگەڵ هیچ جووڵانەوەیەكی نەخێر نییە، ئێمە دەڵێین بەڵێ‌ بۆ ریفراندۆم و سەربەخۆیی، بەڵام دوای ئەو (بەڵێ‌)یە كۆمەڵێك بەڵاممان هەیە، ئەم بەڵامانە لەگەڵ نەخێرەكەدا یەك ناگرنەوە، بەڵامی خەڵكی دڵسۆز و پەرۆشی ئەم وڵاتەن، ئەم بەڵامانە لەسەرەنجامی تێگەیشتن لە فاكتە كوردستانیەكان و كۆمەڵایەتییەكان و ناوچەیی و نێودەوڵەتیەكان هاتوون و لەخۆڕا نەهاتوون، پێویستە سەركردایەتی سیاسی كوردستان نادیدەی ئەم بەڵامانە نەگرێت و چارەسەری ئەم بەڵامانە بكەن بۆ ئەوەی هەموومان لەسەری كۆك بین".