یەكینەكانی پاراستنی گەل( یەپەگە) رایدەگەیەنێت كە سوپای توركیا بەنیازی داگیركردنی خاكی كۆبانێ بووە هێزەكانیان ناچاریان کردوون پاشەکشە بکەن.
یەكینەكانی پاراستنی گەل( یەپەگە) لە ڕاگەیەندراوێکدا کە ئەمڕۆ بڵاویکردۆتەوە ڕایگەیاند "هێرش و پێشێلکارییەکانی سوپای تورک بۆ سەر خاکی ڕۆژئاوای کوردستان بەردەوامە، سوپای تورک پاش ئەوەی هەوڵدانەکانی بۆ داگیرکردنی کانتۆنی عەفرین بێ ئەنجام مایەوە، هەوڵیدا کانتۆنی کۆبانێ داگیر بکات، بەڵام هێزەکانمان وەڵامیان دانەوە و پیلانەکەیان پوچەڵ کردنەوە".
لە درێژەی ڕاگەیەندراوەکەدا هاتووە "ڕۆژی ٦ی مانگ کاتژمێر ١٢:٠٠ی شەو بۆ ٠٤:٠٠ی بەرەبەیانی سەربازانی سوپای تورک بە چەکی قورس هێرشیان کردە سەر گوندەکانی مالکییە و مارانەز، هەر ئەو ڕۆژە سەربازەکانی سوپای تورک دیسانەوە بە چەکی قورس هێرشیان کردە سەر بەلوونییە سەربە شارۆچکەی شەراغ کانتۆنی عەفرین، لەلایەکی دیکەوە دەستڕێژی گولـلەیان لە گوندی عەین دەقنە و گردی شەهید شیلان و گردی قەستەلە و گردی ئیسکا".
ڕاشیدەگەیەنێت "هاوکات لە هەوڵێکی داگیرکارانەدا هێرشیان کردە سەر گوندی بۆبانی سەربە کانتۆنی کۆبانێ، سەربازەکانی سوپای تورک سنوورەکانی کانتۆنی کۆبانێیان بەزاند و هاتنە ناو خاکی کۆبانێیەوە، پاشان هێزەکانمان وەڵامی ئەو دەستدرێژییەیان دایەوە و سەربازەکانی سوپایان ناچار کرد پاشەکشە بکەن، لەلایەکی دیکەوە سەربازەکانی سوپای تورک بە چەکی قورس هێرشیان کردە سەر گوندی مزرداویتی سنوورەکانی ڕۆژهەڵاتی کۆبانێ".