نێچیرڤان بارزانی، جێگری سەرۆکی پارتی دیموکراتی کوردستان ڕایگەیاند، ھیچ حزبێک بە فەرمی داوای دواخستنی ھەڵبژاردنی نەکردووە.
لە ھەولێر شاندێکی پارتی لەگەڵ ھاوپەیمانی بۆ دیموکراسی دادپەروەری کۆبوونەوە و لە کۆنگرەیەکی ڕۆژنامەوانیدا نێچیرڤان بارزانی ڕایگەیاند، کۆمسیۆن لە %٩٥ ڕێکارە ھونەرییەکانی ھەڵبژاردنی تەواوکردووە و ھیوادارن ھەڵبژاردن بە شێوەیەکی ئارام بەڕێوەبچێت، وتیشی، کۆبوونەوەیان لەگەڵ ھاوپەیمانی و لایەنەکانی تریش بۆ ئەوە بووە کۆدەنگییەک دروست بکەن لەبارەی چوونی کورد بۆ بەغدا.
نێچیرڤان بارزانی ئاماژەی بەوەشکرد، وەک بنەما کۆدەنگییەک لە نێوان حزب و لایەنەکاندا ھەیە بۆ ئەوەی کورد بە یەکڕیزی بچێتە بەغدا، بەڵام میکانیزمی ئەو چوونە بۆ بەغدا دواتر قسەی لەسەر دەکرێت.
هەرلە کۆنگرە ڕۆژنامەوانیەکەدا بەرھەم ساڵحیش سەرۆکی ھاوپەیمانی بۆ دیموکراسی و دادپەروەری ڕایگەیاند، ئەوان سەرقاڵی ڕێکخستنەوەی ھاوپەیمانین و بەشداری ھەڵبژاردنی پەرلەمانی کوردستان ناکەن کە لە ٣٠ ی ئەیلولدا بەڕیوەدەچێت.