وەزارەتی كاره‌بای هه‌رێمی كوردستان رایگه‌یاند، له‌م مانگه‌دا پێدانی كاره‌بای نیشتمانی له‌ 20 كاتژمێر نزیك بووه‌ته‌وه‌، ئاشكراشیده‌كات، بۆ مانگی داهاتوو پێدانی كاره‌با زیاتر ده‌بێت.

ئه‌ندازیار ئومێد محه‌مه‌د، به‌ڕێوه‌به‌ری گشتی كۆنتڕۆڵ و گه‌یاندنی كاره‌بای سلێمانی ڕایگەیاندووە: له‌م مانگه‌دا پێدانی كاره‌با له‌ نێوان 18 بۆ 20 كاتژمێر كاره‌بای نیشتمانی بووه‌ و ئه‌وه‌ی دیكه‌ی به‌ موه‌لیده‌ی ئه‌هلی پڕ كراوه‌ته‌وه‌.

ئەو بەرپرسەی وەزارەتی کارەبا وتوشیەتی "بۆ مانگی 10 كه‌ وه‌رزی گه‌رما تا راده‌یه‌ك نه‌ماوه‌ و هاوڵاتییان كه‌متر ئامێره‌كانی فێنك كه‌ره‌وه‌ به‌كارده‌هێنن، پێشبینی ده‌كه‌ین له‌ سه‌رووی 20 كاتژمێر كاره‌با بدرێته‌ هاوڵاتییان".

له‌ باره‌ی ئاستی به‌رهه‌مهێنانی كاره‌باوه‌، به‌ڕێوه‌به‌ری گشتی كۆنتڕۆڵ و گه‌یاندنی كاره‌بای هه‌رێم بە وێستگەی ڕاگەیانبووە "له‌ ئێستادا ئاستی به‌رهه‌مهێنانی كاره‌با له‌ نێوان دوو هه‌زار و 600 بۆ دوو هه‌زار و 700 مێگاواتدایه‌".