شەوی ڕابردوو دوو بوومەلەرزەی یەک لە دوایی یەک شاری کەلاریان هەژاند بەدوای یەکدا کە چەند خولەکێکیان نێوان بوو شاری کەلاریان هەژاند.

سیروان ساڵح، پسپۆری جوگرافیا و به‌ڕێوه‌به‌رى لاپەڕەی كه‌شوهه‌واى گه‌رمیان ڕایگەیاند "ئه‌مشه‌و 17/11/2018 له‌ دوو كاتى جیاوازدا كه‌ نێوانیان ته‌نیا 4 خوله‌ك بووه‌، 2 بومه‌له‌رزه‌ له‌نزیك گوندێكى باشوورى شارى كه‌لار ڕوویان دا".

ڕاشیگەیاندووە "بومەلەرزەی یه‌كه‌م كاتژمێر 6:41 خوله‌كى شه‌و بووه‌ و گوڕه‌كه‌ى 2.9 پله‌ بووه‌ به‌پێى پێوه‌رى ڕێخته‌ر له‌ قوڵایی 18 كیلۆمه‌تر و زەویلەرزەی دووه‌م گوڕه‌كه‌ى 3.3 پله‌ بووه‌ به‌پێى پێوه‌رى ڕێخته‌ر و له‌ كاتژمێر 6:45 خوله‌كى شه‌و ڕووی دا له‌ قوڵاتیی 15 كیلۆمه‌تر".

تاکو ئێستا به‌ڕێوه‌به‌رایه‌تى گشتى كه‌شناسی و بومه‌له‌رزه‌زانى هه‌رێمى كوردستان هیچ زانیارییه‌كى له‌باره‌ى ئەو بومەلەرزانەوە بڵاونه‌كردووه‌ته‌وه‌.