نەخشەڕێگەی سەرۆكی وەزیرانی عیراق بۆ دەستكاریكردنی بودجەی 2019 ئاشكرادەكرێت، پەرلەمانتارێكی كوردیش دەڵێت "پشكی هەرێمی كوردستان لە بودجە، بەڕێژەی 3.9 كەمدەكات".
ئەحمەد حاجی رەشید، ئەندامی فراكسیۆنی كۆمەڵی ئیسلامی، لەئەنجومەنی نوێنەرانی عیراق، لەئەكاونتی خۆی لەتۆڕی كۆمەڵایەتی فەیسبووك، نەخشەڕێگەی عادل عەبدولمەهدی سەرۆك وەزیرانی عیراقی لەبارەی دەستكاریكردنی بودجەی 2019 بڵاوكردەوەو رایگەیاندووە، "ئەم بەڵگەنامە دەستنوسە، كە بە خەتی سور لەلایەن سەرۆك وەزیرانی عیراقەوە لەسەری نوسراوە، كۆتا گفتوگۆی پرۆژەیاسای بوجەی گشتییە، كە سەرۆكی ئەنجومەنی وەزیران ئەم پێشنیارانەی كردوە".
پێشنیازەكانیش ئەمانەن:
یەكەم: دوو نرخ هەبێت بۆ فرۆشتنی نەوت، نرخێكی نەگۆڕ بۆ بوجەی بەكاربەرو نرخێكی گۆڕاو بۆ بوجەی وەبەرهێنان.
دووەم: ئەو نرخەی كە نەگۆرە (50) دۆلار بۆ هەر بەمیلێك نەوتی فرۆشراو.
سێیەم: بڕی داهاتی نەوت لە 97.7 تریلیۆن دینار دەبێت ببێت بە70.8 تریلیۆن دینار، ئەگەر بڕی 11.8ی داهاتی جگە لەنەوتی بەدەست بێت، ئەوا بڕی داهاتی گشتی دەبێتە 82.6 تریلیۆن دینارو بڕی 12 تریلیۆن دینار كورتهێنانی بۆ زیاد بكرێت، سەرجەم خەرجییە تەرخانكراوەكان دەبێت بەنزیكەی 95 تریلیۆن دینار، ئەگەر ئەم بڕە لەخەرجییە گشییەكانی نوسخەی پێشوو تەرخانكراوە كە 132 تریلیۆن دینارە دەربكەین، ئەوا دەبێت 37 تریلیۆن دینار لەخەرجییە گشتییەكان كەم بكرێنەوە.
چوارەم: بڕی كورتهێنان لە 26.7 تریلیۆنەوە كەمدەكرێتەوە بۆ 12 – 15 تریلیۆن دینار، واتە گۆڕانكانی لەتەواوی وەزارەت و بەشەكاندا دەبێت روبدات.
پێنجەم: پشكی هەرێمیش لەو بڕەی كە دانراوە 3.9 كەمدەكات، دەبێت رێگاكانی زیادكردنی پشكی هەرێم ئەو پلانە بێت كە لەگەڵ وەزیری داراییدا تاوتوێمان كرد .